Një lajm i trishtë ka ardhur mëngjesin e kësaj të premte. Ish-kryebashkiaku i Pukës dhe një nga mjekët më të respektuar të zonës. Ndue Cara, ka mbyllur sytë përgjithmonë në moshën 77-vjeçare.
Burime për mediat bëjnë me dije se Cara u mposht mëngjesin e sotëm nga sëmundja me të cilën prej kohësh ishte duke luftuar.
“Pukjani i mirë” kështu i referoheshin banorët e zonës Ndue Carës, i cili përgjatë gjithë jetës së tij nuk u dallua vetëm si një mjek i shkëlqyer, por si një prej intelektualëve dhe drejtuesve më të mirë të zonës, ndër vite.
Ai shërbeu si kryetar i Bashkisë së Pukës përgjatë viteve 2000-2003, ndërkohë më pas vijoi të qëndronte pranë qytetarëve të tij si mjek, duke u shërbyer atyre në çdo orë dhe kudo, pa marrë parasysh distancën e largët ku duhet të shkonte dhe viteve që i rëndonin mbi supe, gjatë kohëve të fundit.
Përgjatë jetës së tij, Ndue cara ka dalluar si drejtues i Shëndetit Publik, si kryetar i bashkisë Pukë, kryekomunar i Gjegjanit, si këshilltar e vendimarrës e së fundmi si mjek në një prej zonave më të largëta veriore.
Në një intervistë të dhënë dy vite më parë, ai tregoi dhe vështirësitë me të cilat përballej për të qenë pranë të sëmurve. Pasi i dukej të udhëtonte 92 km nga qyteti i Pukës deri në Qendrën Shëndetësore të Fierzës, madje shpesh detyrohej që të ecte edhe në këmbë maleve dy-tri orë për të qene pranë të sëmurëve.
“Ne arrijmë të bëjmë vaksinat dhe urgjencat por për arsye të terrenit të vështirë nuk mund të realizojnë atë që duhet, kujdesin permanent. Sepse ka paciente që janë në vështirësi fizike e mendore që nuk mund të vijnë në qendrën shëndetësore. Ata duan një kujdes të veçantë”,u shpreh mjeku dy vite më parë.
