Në lidhje me restaurimin e Burgut të Spaçit!
PARTIA LËVIZJA E LEGALITETIT
Tiranë, më 07/06/2025
Partia Lëvizja e Legalitetit, trashëgimtare e idealeve zogiste dhe mbështetëse e pathyeshme e frymës antikomuniste, dënon me forcë çdo përpjekje për të shtrembëruar misionin e vërtetë të restaurimit të Burgut të Spaçit.
Është e papranueshme që tentativa për reustuarimit e Burgut të Spaçit të bëhet në mënyrë tendencioze, duke mbuluar me harresë kujtesën kolektive mbi krimet e diktaturës komuniste dhe për të zbehur në vazhdimësi nderimin e vuajtjeve të mijëra të burgosureve politikë në këtë burg.
Spaçi nuk është thjesht një ndërtesë, ky burg është simboli i dhimbjes dhe rezistencës. Në këtë burg kanë vuajtur dhe kanë dhënë jetën shumë patriotë, ndër ta edhe figura të shquara legalistë, besnikë të Mbretërisë Shqiptare. Pikërisht për këtë arsye, PLL ndjen detyrimin moral e historik që ky vend të mos mbetet në harresë apo të trajtohet si një rrënojë e ftohtë, ai duhet të restuarohet dhe të shndërrohet në një vend kujtese, reflektimi dhe edukimi historik.
Ai ka vetëm një qëllim: të dëshmojë për krimet e komunizmit dhe të nderojë viktimat e tij, të dënuar dhe persekutuar nga regjimi për bindjet e tyre politike.
I bëjmë thirrje të gjitha forcave politike, organizatave dhe opinionit publik të mos heshtin dhe të mos e politizojnë një çështje kaq të ndjeshme. Kujtesa historike është pronë e përbashkët e të gjithë shqiptarëve dhe kërkon respekt, bashkëpunim dhe përgjegjësi, për të vërtetën, drejtësinë dhe nderimin e viktimave të diktaturës, të atyre që vuajtën për demokracinë dhe lirinë e Shqipërisë në burgjet e diktaturës komuniste.
