Kreu i Partisë Demokratike, Sali Berisha ka zhvilluar një vizitë në Kishën Ortodokse në Kavajës këtë të diel, ku ka uruar të gjithë besimtarët për festën e Pashkës.
Gjatë fjalës së tij, lideri i opozitës, Sali Berisha ka deklaruar se, qeverisja e re pas 11 Majit do të ketë dy prioritete për komunitetet fetare, e para është dyfishimi i fondit për ta dhe e dyta, rikthimi i pronave të tyre, që deri më tani janë abuzuar dhe grabitur.
Në vizitën e kryer këtë të diel për kremtimin e Pashkës në Kavajë, kreu i PD, Sali Berisha vlerësoi figurën dhe kontributin e imzot Anastas Janullatos, duke e cilësuar atë si një prej personaliteteve më të shquara të besimit, dijes dhe përkushtimit në shërbim të Shqipërisë.
Berisha theksoi se Janullatosi ishte një “burrë vigan dhe meshtar vigan”, i cili me përkushtim të rrallë e ngriti nga hiri Kishën Ortodokse Autoqefale të Shqipërisë, duke fituar respektin dhe dashurinë e besimtarëve shqiptarë.
Në vijim të fjalës së tij, krydemokrati Sali Berisha u ndal edhe te kontributi historik i komunitetit arumun në Rilindjen dhe Pavarësinë Kombëtare, duke përmendur emra dhe figura të shquara si Aleksandër Moisiu dhe mbështetjen e komunitetit vllah në Bukuresht ndaj Ismail Qemalit.
