Nga Stefano Marcelli
Në vendin tim, Itali, thonë se tri të dhëna bëjnë një provë.
Në fillim të kësaj jave Edi Rama kishte pikërisht tre pista. Ato dëshmojnë se situata, për Shqipërinë dhe veçanërisht për të, po ndryshon. Dhe jo për të mirë. Në fakt, ai tregoi të ishte shumë nervoz.
Para zgjedhjeve të mëdha të vitit 2024, kryeministri shqiptar kishte vënë bast gjithçka për fitoren e së djathtës sovrane, i mbështetur edhe nga mikesha e tij Giorgia.
Gjërat nuk vajtën ama aq mirë për të në Evropë, ku aleanca e Partisë Popullore me Socialistët bllokoi përparimin e së djathtës ekstreme.
Por në vend të kësaj ai padyshim gjeti të ardhmen amerikane ku kthimi triumfues i Donald Trump tani projekton ideologjinë sovraniste në të gjithë planetin.
Ndodhi gjithçka të hënën: 11 shkurti 2025 është një datë që do të mbetet e skalitur në kujtesën dhe historinë politike të Edi Ramës. Atë ditë, një vegël e vjetër e politikës republikane amerikane zbarkoi në Tiranë: Chris LaCivita, konsulenti politik që udhëhoqi fushatën fitimtare elektorale të Trump.
Djali i dy emigrantëve (një italian dhe një irlandeze), Chris, për ironi, ka mbajtur poste të rëndësishme drejtuese në Partinë Republikane gjatë viteve dhe i ka dhënë një pamje vintage fushatës presidenciale të vjeshtës së kaluar duke përdorur teknika të thjeshta: duke e mbajtur kandidatin e tij në qendër të vëmendjes së medias çdo ditë me përdorimin e deklaratave dhe gjesteve spektakolare dhe gjithnjë e më të bujshme.
Dhe kjo është edhe teknika që, me sa duket, do të përdorë edhe Trump gjatë përmbushjes së mandatit të tij të ri.
Chris bëri të njëjtën gjë në Tiranë, duke i ofruar një endorsment të papritur një Sali Berishe të fikur nga vitet dhe gjithashtu deri dje, nga cilësimi i “të padëshiruarit” që i atribuohet nga Departamenti Amerikan i Shtetit dhe ai Britanik për korrupsion.
“Berisha është miku i vërtetë i Shteteve të Bashkuara”, deklaroi ai, duke hedhur publikisht kryeministrin aktual shqiptar nga karroca e presidentit të ri amerikan.
Një ndërhyrje e përbashkët tre muaj para zgjedhjeve politike në Shqipëri. Dhe u kuptua menjëherë se këto nuk ishin vetëm fjalë, kur policia arrestoi kryebashkiakun socialist të Tiranës Elion Veliaj dhe vuri në arrest shtëpie bashkëshorten e tij duke i shoqëruat me një listë me akuza shumë të rënda për korrupsion, pastrim paraje dhe fshehje të ardhurash.
Rama e mori mesazhin dhe theu angazhimin e tij të kahershëm për të mos komentuar veprimet ligjore të SPAK-ut, një krijesë e sponsorizuar nga administrata e mëparshme e Uashingtonit.
Rama goditi në fakt gjyqtarët e antikorrupsionit dhe u shfaq i irrituar në videon ku u përgjigjej pyetjeve të qytetarëve.
Pamjet e zemërimit të pakontrolluar të kryeministrit tashmë janë shndërruar në internet në një meme ku mikesh e tij e dashur Giorgia i thotë “Nuk të dua më. Tani kam një tjetër”.
Po, sepse kryeministrja italiane Giorgia Meloni u propozoi ministrave të saj që të ndryshonin në mënyrë të njëanshme thelbin e marrëveshjes për qendrat e emigracionit në Shqipëri (një operacion që dështoi keq), duke i kthyer ato në qendra riatdhesimi për emigrantët e paligjshëm në përgjithësi dhe jo vetëm për azilkërkuesit që u refuzohet azili.
Pra, marrëdhënia e privilegjuar që dukej se rregullonte marrëdhëniet mes Italisë dhe Shqipërisë, nuk i qëndroi dot asnjë sekondë shtytjes së njeriut të Trump: Giorgia duket se nuk ka ndërmjetësuar për Edin tek Trump dhe për më tepër, synon të modifikojë marrëveshjet mes dy qeverive pa u konsultuar me të.
Një ditë vërtet e keqe për Ramën, i cili, si politikani më i dashur dhe më i respektuar nga liderët perëndimorë, po sheh dyer që i përplasen në fytyrë në prag të votimit për mandatin e tij të katërt.
Ndryshe do të ishte e pakuptueshme pse, pasi ka heshtur përballë një sërë arrestimesh ministrash dhe socialistësh në funksione të tjera, ai reagoi kaq dhunshëm përballë atij të kryebashkiakut të Tiranës, i cili, siç e dinë të gjithë, është konkurrenti i tij kryesor në Parti dhe të dy nuk është se e duan kaq shumë njëri-tjetrin.
Dihet gjithashtu se SPAK, tek i cili një pjesë e madhe e mirë e njerëzve kanë besim në Shqipëri, një vend ku korrupsioni është i rrënjosur thellë, ka lindur dhe vepron me mbështetje nga Uashingtoni dhe Bashkimi Evropian dhe që politika e djathtë është pak e interesuar për ta luftuar atë.
Hetimi për kryebashkiakun e Tiranës dhe bashkëshorten e tij kishte nisur prej disa kohësh, por koincidenca mes mbështetjes së Chris-it ndaj Berishës dhe arrestimit të çiftit Veliaj, pikërisht për këtë arsye, nuk duket rastësi.
