Nga Edlira Devolli LEKA
Edi Rama, mjeshtër i fjalëve të mëdha dhe realiteteve të vogla, u bëri thirrje emigrantëve të regjistrohen dhe të votojnë, duke shpallur se vota për ç’do forcë tjetër është një votë e çuar dëm. Muret e shtetit shqiptar, sipas tij, po forcohen vit pas viti dhe po zgjaten për t’iu bashkuar Europës. Një fjalim pompoz, i veshur me patetizëm politik, por që tingëllon bosh për ata që e dinë realitetin.
Sepse, nëse vërtet këto mure po rriteshin e forcoheshin, pse shqiptarët po largohen masivisht nga vendi?
Pse pas ç’do cikli elektoral, ç’do “gur” i vendosur në këtë mur të imagjinuar rezulton një tullë e rënë mbi kokën e qytetarëve??
Ky mur, po forcohet apo po rrëzohet?
Personalisht do doja që të ishte i vërtetë fakti që shteti shqiptar po ndërton një mur të fortë drejt Europës, sepse të gjithë e duam këtë. Mirëpo, ka disa “detaje” që tregojnë se ky mur është më shumë një gërmadhë sesa një ndërtim i qëndrueshëm.
Që ky mur është gërmadha e tregon kanabizimi i vendit dhe krimi i organizuar që lulëzon në nivelet më të larta. Droga aksesohet lirisht nga të gjitha moshat, në të gjitha shkollat, nje ekspozim i papreçedentë. Policia shpesh hesht, dhe kur ndërhyn, vepron si një spektator i dorëzuar përpara këtij realiteti.
Patronazhimi është sistemi famëkeq i kontrollit mbi votën e qytetarëve, është dëshmi e gjallë se demokracia shqiptare është deformuar. Partia në pushtet e sheh qytetarin si një numër në listën e votuesve të kontrolluar, jo si një individ me të drejtë të lirë zgjedhjeje.
Referuar të dhënave të Eurostat dhe raportimeve të tjera ndërkombëtare, mbi 700,000 shqiptarë kanë braktisur vendin vetëm në dekadën e fundit. Në vend që të votojnë në Shqipëri, qytetarët po votojnë duke ikur dhe duke mos u kthyer më. Dhe ky është një votim i pakontestueshëm.
Si mund t’u kërkosh emigrantëve të votojnë një sistem që i dëboi? Tepër ironike! Emigrantët, të cilët u larguan për shkak të keqqeverisjes, tani ftohen të votojnë për të ruajtur të njëjtin sistem që i dëboi!
Po! Emigrantët duhet të regjistrohen, por jo për të betonuar pushtetin e një qeverie që ka ndërtuar një sistem që funksionon vetëm për një kastë të privilegjuar. Ata duhet të votojnë për shpëtimin e Shqipërisë, jo për betonizimin e status quo-së.
E nëse muret e shtetit po forcoheshin, atëherë përse Shqipëria nuk është ende në Bashkimin Europian? Përse BE vazhdon të kërkojë më shumë luftë kundër korrupsionit, më shumë sundim të ligjit, më shumë demokraci funksionale?
Sepse muri që flet Rama nuk është një mur që po i bashkon shqiptarët me Europën. Ky është një mur që po i ndan nga një e ardhme më e mirë, një mur që po i izolon në një realitet të deformuar, ku pushteti është i paprekshëm, ndërsa qytetari është një figurë e zhbërë në procesin politik.
Rama flet për gurët që emigrantët duhet të vendosin mbi muret e Shqipërisë. Por këta gurë nuk po ndërtojnë një shtet të fortë, por një sistem të pashkatërrueshëm të oligarkisë dhe patronazhistëve.
Vota nuk është një gur për të përforcuar një mur të kalbur. Vota është një mjet për ta rrëzuar atë mur dhe për të ndërtuar diçka të re, diçka më të ndershme, diçka që shqiptarët nuk do ta braktisin me vrap.
Emigrantët duhet të regjistrohen, jo për të mbajtur në këmbë këtë mur, por për të shpëtuar Shqipërinë nga rrënimi i tij.
#djathtas1912, #sistemindershëm, #shpresaevetme,#alternativaeduhur#listatëhapura
