Shtetet e Bashkuara kanë shpallur 9 janarin ditë zie kombëtare për nder të ish-presidentit Jimmy Carter, i cili vdiq të dielën në moshën 100-vjeçare. Këtë e ka bërë të ditur Shtëpia e Bardhë.
“I bëj thirrje popullit amerikan të mblidhet në këtë ditë në vendet e tyre të adhurimit për të nderuar kujtimin e Presidentit James Earl Carter Jr.
Ftoj ata në mbarë botën që ndajnë pikëllimin tonë të bashkohen me ne në këtë përkujtim solemn”, tha presidenti në largim Joe Biden në një dekret të publikuar në internet, shkruan A2 CNN.
Presidenti i 39-të i Shteteve të Bashkuara Jimmy Carter u nda nga jeta në shtëpinë e tij në Xhiorxhia i rrethuar nga familjarët e tij.
“Sot, Amerika dhe bota humbën një udhëheqës të jashtëzakonshëm, burrë shteti dhe humanitar.
Ajo që është e jashtëzakonshme për Jimmy Carter është se miliona njerëz në të gjithë Amerikën dhe botën që nuk e kanë takuar kurrë, e konsideruan atë një mik të dashur.
Me dhembshurinë dhe qartësinë e tij morale, ai punoi për të zhdukur sëmundjet, për të krijuar paqen, për të avancuar të drejtat civile dhe të drejtat e njeriut, për të promovuar zgjedhje të lira dhe të ndershme, për të strehuar të pastrehët dhe për të mbrojtur gjithmonë të fundit midis nesh jetët e njerëzve në mbarë botën”, u shpreh presidenti Biden, raporton A2 CNN.
Presidenti i sapozgjedhur Donald Trump u bëri thirrje të gjithëve që ta mbajnë familjen Carter në lutjet e tyre.
“Sfidat me të cilat u përball Jimmy si President erdhën në një moment kyç për vendin tonë dhe ai bëri gjithçka që ishte në fuqinë e tij për të përmirësuar jetën e të gjithë amerikanëve.
Për këtë, ne të gjithë i detyrohemi atij një borxh mirënjohjeje”, u shpreh Trump, përcjell A2 CNN.
Carter u bë ish-presidenti më i vjetër i gjallë kur ai tejkaloi rekordin e mbajtur nga i ndjeri George HW Bush në mars 2019.
Demokrati Carter, shërbeu një mandat të vetëm si president nga viti 1977 deri në 1981.
Ai pati sukses në vitin 1978 në misionin e pamundur të një marrëveshjeje mes Egjiptit dhe Izraelit dhe u nderua me Çmimin Nobel për Paqen në vitin 2022.
