Nga takimi me grupet e punës së qarkut të Tiranës për zgjedhjet parlamentare të 11 Majit, kryedemokrati Sali Berisha është ndalur të komentojë rrëzimin e regjimit të Bashar al-Assad në Siri, duke bërë një paralelizim me qeverinë Rama.
Duke sqaruar se “pushteti dhe kryeqyteti janë ndonjëherë sinonime të njëri-tjetrit”, Berisha shtoi se edhe ai që demokratët e cilësojnë si regjimi i Ramës, do të rrëzohet njëjtë si diktatura në Siri.
“Kam kënaqësinë që të takoj sonte trupën elektorale të PD-së për kryeqytetin e Shqipërisë, për Tiranën, e cila ka një mision të madh, ka një mision të vërtetë, fitoren e opozitës në Tiranë dhe përmbysjen e narkodiktaturës në Shqipëri. Ra Damasku, ra Asadi, bie Tirana, bie Edvini. Këto janë raporte të vërteta. Pushteti dhe kryeqyteti janë ndonjëherë sinonime të njëri-tjetrit”.
Ish-kryeministri i udhëzoi të vetët duke u thënë se përmbushja e misionit për largimin e Edi Ramës nga pushteti, ju takon atyre ta realizojnë përmes një ekipi të fortë elektoral.
“Ndaj dhe në përmbushje të këtij misioni, iu takon juve së pari të riparoni çdo gabim që mund të jetë bërë në krijimin e këtij ekipi elektoral për kryeqytetin dhe të përfshini personalitete, aktivistë, anëtarë, mbështetës influentë në zonat tona, në mënyrë që të jemi sa më përfaqësues dhe sa më të fortë në këtë betejë. Kjo është një betejë e një rëndësie, më e rëndësishmja”, u shpreh lideri i selisë blu.
Si për të theksuar rëndësinë e zgjedhjeve parlamentare të 2025, Berisha tha se “po të kemi parasysh pasojat shkatërrimtare demografike të këtij regjimi, PD nuk ka bërë ndonjëherë në ekzistencën e saj betejë më të rëndësishme se kjo betejë”.
