Prej më shumë se një viti, Tropoja është vënë padrejtësisht nën shënjestrën e drejtësisë.
Jo se është shënjestrar për tu pastruar nga korrupsioni e krimi, por për tu lënë pa drejtësi fare.
Drejtësia në Tropojë prej 1 viti është dënuar me vdekje. Ekzekutimi u bë pak ditë më parë, kur 2 punonjës shteti me një çekiç e pinca hoqën tabelën e fundit që tregonte se në këtë qytet kishte një institucion drejtësie.
Pak nga pak, më herët ishin hequr dosjet, zyrat, madje dhe togat e zeza që vishnin gjyqtarë e prokurorë në këtë qytet.
Tani ska më asnjë vend ku të kërkohet e drejta në Tropojë. Nëse dikush do drejtësi duhet të marrë rrugët, të shkojë shumë larg. Kilometra të tëra për të shpresuar se do gjejnë drejtësi në Kukës apo në Tiranë. Një rropatje e pamerituar e qytetarëve tropojanë që prapë duhet të marrin rrugët edhe për një çështje të thjeshtë, duke humbur shumë kohë dhe shpenzime pa fund.
Në emër të Reformës së drejtësisë, drejtësia në Tropojë u vra ditën për diell dhe askush nuk ngriti zërin.
As politika, as pushteti lokal, as njerëzit me zë publik, askush.
Lamtumira e fundit drejtësisë iu dha këtë javë, në kulmin e fushatës, por kandidatët që këtë periudhë shkojnë cep më cep qytetit e fshatrave, as e kanë guximin të thonë një fjalë për këtë. Për ta ska rëndësi fati qytetarëve, por vota e tyre dhe pastaj le të ecin me kilometra të tëra për pak drejtësi.
Ata, kandidatët, do të ikin me votat në xhep, ashtu si iku drejtësia prej Tropojës duke e lënë gërmadhë atë vend ku normalisht tropojanët do të merrnin pak shpresë drejtësie.
Tani që drejtësia vdiq, secili po hedh nga një grusht dhe mbi varrin e saj.
Lamtumirë drejtësi, Tropoja do të ta ndjejë pafund mungesën.
Shpresoj që ata që e vranë drejtësinë e Tropojës të ndjehen krenarë për krimin e tyre.
