Nga Elsa Sula
Të parët na edukuan me atë lloj fryme, që kur të lindë vajzë, lind një mallkim në shtëpi dhe është mallkim i dhjetëfishtë nëse mbush 20 vjet në ‘derë të huaj’.
Të parët na mësuan keq, me hir apo me pahir burrat e tjetërsuan figurën e vajzave me zë dhe jo vetëm, një shoqëri e tërë derdh lumë atë dufin e dështimeve të tyre mbi vajzat që kanë zë, e mbi të gjitha kanë zë edhe për ato që iu nënshtrohen, baballarëve, vëllezërve, burrave, e nëse do të kenë rastin të punojnë eprorëve të tyre.
Vajzat që nuk kanë marré për të fol, nuk janë vajza më pak të ndershme e më pak të moralshme se ato që vetëm pohojnë, pohojnë padrejtësitë, pohojnë të gabuarën, pohojnë atë që nuk duan, pohojnë dhunën…
E ato vajza dhe gra që kanë guxim për të dalë kundër burrave nuk janë më pak të përgjegjshme se familja është e shenjtë dhe madje e duan më shumë se ato që prindërit i fejuan e i martuan herët për të krijuar familje, ndonëse një familje e shëndetshme rrjedh prej një prindërimi të shëndetshëm, ku babai dhe nëna janë të barabartë në përgjegjësi prindërore.
Ato vajza që sot kanë marrë mbi supe gjithë imoralitetin që shoqëria iu adreson, veçse kanë forcë për të thënë jo, për çfarë e arsyetojnë, mendojnë apo ndjejnë të gabuar nuk janë imorale, por përballen me një mentalitet të flliqtë. Një mendësi, që siç duket i ndan gratë dhe burrat në një kufi, e ato që e shkelin janë të dala boje, që nuk kanë sedër dhe ato që e shkelin atë tokë janë ato vajzat me zë, që vlerat monetare nuk ua luhasin karakterin, janë ato vajzat që ngrihen e korrin suksese vetë, pa patur nevojë për një patericë mashkullore, janë ato vajzat që i njohin, i kërkojnë dhe luftojnë për të drejtat e tyre, janë ato vajzat që pavarësinë ua kanë mësuar prindërit, dhe patjetër ato vajzat që kanë dështuar disa herë e përsëri ia kanë dalë edhe kur kanë qenë vetëm.
Vajzat që arrijnë të shkelin ato kufinj që një shoqëri patriarkale i quan tabu, janë vajzat e arsimuara dhe të mirëedukara që në gjenezë, ndaj për të patur një shoqëri të fortë, të qenësishme, demokratike dhe të shëndetshme duhet të arsimojmë vajzat.