Partia Demokratike ka denoncuar se sipërfaqet pyjore do t’i jepen oligarkëve me një draft vendi qeveritar që do të kalojë së shpejti.
PD paralajmëroi se “ky vendim nuk është gjë tjetër veçse përpjekja e radhës për të futur duart e gjata të korrupsionit në pasurinë e fundit kombëtare ende të pashfrytëzuar, pyjet e vendit”.
Anëtarja e Kryesisë, Fatbardha Kadiu në një deklaratë për mediat thekoi se biznesi qeveritar i ndërtimit ka planifikuar resorte të reja në zona pyjore, dhe kjo “do të thotë se mijëra pemë të rrezuara, qindra hektarë pyje të shpyllëzuar, dhe ndërhyrje mjedisore që e zgjerojnë edhe më gjurmën e ndotjes”.
PD u kërkoi organeve të drejtësisë të hetojnë “mbi këtë projekt ligësie, dhe Kuvendit të Shqipërisë që të rezistojë”, teksa shtoi se ligjvënësit nuk mund të sillen si pupacë qeveritarë.
Deklarata:
Pasi premtuan pyje orbitale dhe në vend të tyre mbollën hekur e beton;
Pasi folën për Rilindje urbane dhe shtruan me pllaka sheshe qytetesh banorët e të cilëve i përzunë me politika anti-qytetare;
Pasi ligjëruan për reforma strukturore dhe e vetmja strukturë që krijuan ishte kanabizimi i vendit;
Pasi u mburrën për epërsi kulturore dhe iu vunë institucioneve dhe veprave të traditës me kazmë e qysqi;
Pasi programuan shëndetësi falas dhe shtrenjtuan vdekjen në spitalet publike;
Pasi transferuan të gjitha pasuritë publike në llogaritë e tyre mbuluar me presta nome;
Pasi dhanë çdo gjë me koncension, nga barnat deri te bregdeti në stilin e lajmëruar që në fillim: “nuk keni para gjë akoma”, e kanë një surprizë tjetër për shqiptarët: shpyllëzimin e vendit!
Një draft-vendim qeveritar që do të kalojë së shpejti, do t’i marrë Shqipërisë edhe territorin e fundit relativisht të paprekur, sipërfaqen pyjore.
Partia Demokratike paralajmëron se, ky vendim nuk është gjë tjetër veçse përpjekja e radhës për të futur duart e gjata të korrupsionit në pasurinë e fundit kombëtare ende të pashfrytëzuar, pyjet e vendit.
Biznesi qeveritar i ndërtimit, pas betonizimit të qyteteve të mëdha dhe bregdetit, me sa duket ka planifikuar resorte të reja në zona pyjore.
Kjo do të thotë mijëra pemë të rrezuara, qindra hektarë pyje të shpyllëzuar, dhe ndërhyrje mjedisore që e zgjerojnë edhe më gjurmën e ndotjes.
U bëjmë thirrje qytetarëve të lirë dhe komuniteteve civile që të vrasin frikën, të tregohen të vëmendshëm para këtij pushtimi të ri qeveritaro-oligarkik, që do të vijë nën maskën e zhvillimit, por do të sjellë para për pak xhepa dhe rrënim për ta.
Partia Demokratike do t’u dalë në krah të gjithë atyre që ngrihen për mbrojtur pasurinë kombëtare të një Shqipërie në rrezik.
U kërkojmë organeve të drejtësisë të hetojnë mbi këtë projekt ligësie, dhe Kuvendit të Shqipërisë që të rezistojë.
Ligjvënësit nuk mund të sillen si pupacë qeveritarë.
