“Unë jetoja në Durrës, me babain, mamanë, dhe vëllezërit. Të gjithë në një banesë. Asnjëherë nuk kam qenë i punësuar, por i vetëpunësuar në tregun e fruta perimeve. Më pas pësova një aksident, u operova dhe e kisha të pamundur të punoja. Dhe hapa një dyqan për tregëtimin e këpucëve të pëdorura”.
Kështu prezantohet përpara prokurorëve Nuredin Dumani, njeri që ka vendosur të flasë dhe që gjatë katër viteve të fundit ishte ‘most wanted” i drejtësisë derisa krimi ku ai mbeti i plagosur i çoi policët në apartamentin ku ai fshihej i plagosur. Me vetëm tetë klasë arsimim, të lëna në mes që në fshatin e lindjes, Selishtë të Dibrës, Nuredin Dumani u end për vite me radhë në qytetin e Durrësit mes varfërisë që tentoi t’i shpëtojë duke kryer vjedhje të vogla.
Durrësi që duhet të ishte streha e re e prindërve Dumani që zbritën në bregdet për të nisur një jetë të re, rezultoi po ashtu pikënisja drejt krimit. Aso kohe, Nuredin Dumani ishte 13 vjeç, një adoleshent dhe anëtar i një familjeje me gjashtë anëtarë, të cilës të tre djemtë iu bënë problematikë me ligjin.
Njëri prej tyre Fitim Dumani u implikua në çështje të shfytëzimit të femrave në qytetin bregdetar, dhe diçka të tillë e pasoi edhe Nuredin Dumani, një i ri që nga viti 2000 kur preku Durrësin dhe për një dekadë ishte në tranzicion dhe me një profil të panjohur deri ditën kur nisi karrierën kriminale duke provuar si hajdut e duke përfunduar si vrasës me pagesë. Edhe emri i vëllait të tretë, Dashnor Dumani gjendet në kartelat e policisë dhe aktualisht po vuan burgosjen për vjedhje në shtetin gjerman.
Nga dëshmia e tij pas bashkëpunimit me drejtësinë, janë zbardhur të paktën 12 ngjarje kriminale, vrasje dhe atentate të parealizuara.
Ai ka treguar përpara prokurorëve të SPAK-ut se ka marrë porosi nga Ervis Martinaj për vrasjen e Endrit Dokles kundrejt 100 mijë eurove.
Dumani ka rrëfyer autorët e ekzekutimit të Fatmira Dedës në vitin 2014, pasi ajo kërkonte drejtësi për vrasjen e djalit të saj Elvis Deda, në vitin 2013.
Ai ka treguar me detaje se porositës i këtij krimi ishte Festim Qoli, i cili i kishte ofruar atij 40 mijë euro për këtë vrasje.
Përpara hetuesve Dumani ka folur edhe për vrasjen e taksistit Bujar Çela, vëllait të armikut të tij Talo Çelës.
Në vitin 2013 pas daljes së tij të parë nga burgu në bazë të dëshmisë së tij, ai tregtonte këpucë të përdorura ndërsa 9 vite më vonë zbardhi një mori me ngjarje dhe ku SPAK pretendon se janë zbuluar 8 grupe kriminale.
“ Në vitin 2013 me sa mbaj mend më takon Talo Çela në një dyqan që unë kisha pas daljes nga burgu. Në këtë dyqan tregtoja këpucë të përdorura. Talo ishte së bashku me Gent Sharrën me një mjet tip Regina. Më tha se kishte një punë për të bërë por na duhen njerëz nga këtej duke nënkuptuar Durrësin”, është shprehur Dumani gjatë një rrëfimi për një nga grabitjet.
Më herët, Dumani ka qenë i skeduar edhe për trafikimin e një vajze në Francë për shfrytëzim prostitucioni dhe i arrestuar për vjedhje.
Gjithashtu, ai ka rrëfyer edhe 6 grabitje që ka kryer me Talo Çelën dhe persona të tjerë në periudhën kohore 2012-2017.
