Ka nisur me debate mbledhja e Grupit Parlamentar të PD. Enkelejd Alibeaj, si kreu i këtij Grupi i është drejtuar ish-kryeministrit Sali Berisha duke i thënë se ishte i paftuar dhe nuk duhet të ishte i pranishëm.
“Je i paftuar. Nuk duhet të jesh në mbledhje se je i përjashtuar”, kështu i është drejtuar Alibeaj ish-kryeministrit Berisha. Kreu i grupit të PD edhe dje e bëri të qartë qëndrimin e tij, se Berisha ishte përjashtuar në 9 shtator nga Lulzim Bahsa, pas shpalljes “non grata” dhe nuk ishte i ftuar në mbledhjen e sotme.
Mirëpo, edhe Sali Berisha ka këmbëngulur në të vetën. Ai dje ju përgjigj menjëherë Alibeajt në një deklaratë për mediat, duke thënë se “i pari në atë mbledhje do të jetë Sali Berisha”. Kështu ka bërë dhe sot, duke shkuar në mbledhjen që ka nisur në zyrat e selisë blu. “Ju duhet të pranoni realitetin”, i është përgjigjur ai Enkelejd Alibeajt.
Të pranishëm deri tani janë rreth 40 deputetë. Newsbomb.al mëson se në këtë mbledhje të deputetëve demokratë që mbahet 60 minuta para nisjes së seancës plenare në Kuvend, nuk merr pjesë Lulzim Basha.
Kryetari i dorëhequr i PD nuk është parë më në selinë blu prej gati dy javësh, kur njoftoi vendimin e tij. Megjithatë, Basha ka nisur disa takime me strukturat në qytete të ndryshme të vendit.
