• Jorida Tabaku: Qeveria po fshihet pas vetos bullgare, asnjë progres për luftën ndaj korrupsionit, zgjedhjet dhe çështjen e medias.
Kryetarja e Këshilit Kombëtar të Integrimit, Jorida Tabaku theksoi se Progres – Raporti i Komisionit Europian, nxori në pah se qeveria shqiptare nuk ka përmbushur kushtet për të hyrë në Bashkimin Europian.
Gjatë fjalës së saj, Tabaku theksoi se ka një mungesë të vullnetit politik për t’u angazhuar në procesin e integrimit europian.
“Stafi i Kuvendit, i sekretariatit ka bërë analizë të plotë dhe ka vënë re një mungesë të një vullneti politik për t’u angazhuar në këtë proces. E kuptoj që ky proces është peng i datave, tryezave, por ashtu siç e thash në mbledhjen e para 3 muajve duhet të bëjmë çdo gjë për të shkuar në atë datë. Me keqardhje vërej që kjo nuk ka ndodhur. “ u shpreh ajo.
Znj.Tabaku shtoi se Shqipëria nuk ka asnjë rezultat në raport me luftën ndaj krimit të organizuar dhe pastrimit të parave. Sipas saj, Shqipëria është larg standardeve të BE-së dhe këmbëngulja e Partisë Demokratike, se procesi i integrimit duhet të jetë një vendim politik, sepse rruga që kemi nisur po cënon rëndë standardet demokratike dhe procesin e integrimit.
“Korrupsioni nuk luftohet me plane të integritetit të Ministrisë së Drejtësisë. Një element tjetër janë kërkesat për azil jashtë vendit që për fat të keq 10 vitet e fundit janë 40% në total të aplikuesve. Unë vlerësoj marrëveshjet e arritura, por nuk shoh arritje konkrete. Është e rëndësishme për forcën politike që përfaqësoj reforma e plotë zgjedhore që lidhet me ndryshimet kushtetuese që kemi paraqitur.” shtoi ajo.
Në fjalën e saj Kryetarja e Këshillit evidentoi se një nga kriteret kyçe të BE lidhet me luftën ndaj korrupsionit është neglizhuar nga qeveria. “Raporti i Transparency International” evidentohet gjendja reale e korrupsioit në Shqipëri dhe për rrjedhojë edhe vullneti i mangët për ta luftuar atë” shtoi Tabaku gjatë fjalës së saj ndërsa analizoi zë më zë shqetësimet e ngritura nga raporti i Këshillit të Europës.
Në këndvështrimin e kryetare së komisionit të Integrimit Europian qeveria ka dështuar totalisht edhe në luftën ndaj korrupsionit por edhe në implementimin e rekomandimeve për Reformën Zgjedhore. Tabaku vuri në pah edhe situatën me zgjedhjet e prillit 2021; “Raporti i OSBE/ODIHR tregon se zgjedhjet në Shqipëri kishin shenja të thella të manipulimit dhe gjithashtu faktet tregojnë se lufta kundër blerjes së votës nuk ka vijuar siç duhet”.
Sipas saj rënia e Shqipërisë në renditjen e TIP dhe gjithashtu mangësitë në vullnetin politik dhe mungesa e luftës kundër korrupsionit janë shpjegimi më i mirë për mungesën e vullnetit politik për zbatimin e detyrimeve ndaj kritereve të ngritura nga BE.
Të gjitha këto defiçenca dhe mangësi, u shpreh në fund znj. Tabaku, nuk mund ta fshehin qeverinë shqiptare pas vetos së Bullgarisë, duke rekomanduar se vendi duhet të plotësojë kushtet dhe të përgatitet pavarësisht datës për Konferencën e parë ndërqeveritare.
