Nga Indrit Vokshi
Si anëtar Këshilli, përpiqem të funksionoj mbi statutin e Partisë Demokratike. Neni 43/2 i statutit, sanksionon se Kuvendin Kombëtar e thërret Këshilli Kombëtar ose kryesia me propozim të kryetarit. Kuvendi mund të mblidhet edhe kur e kërkojnë 1/4 e anëtarësisë ose 1/4 e anëtarëve të Kuvendit Kombëtar.
Në fjalinë ku përcaktohet 1/4, fjalët “mund” dhe “kur e kërkojnë”, na tregojnë se 1/4 nuk ka kompetencë për ta mbledhur kuvendin në mënyrë të pavarur, vetë dhe kur të dojë. Po ta kishte ketë kompetencë, fjalia do të ishte shkruar kështu: “Kuvendi kombëtar duhet të mblidhet kur e vendosin 1/4”. Pra 1/4 nuk ka kompetencë vendimmarrëse por vetëm kompetencë iniciative. Nuk është normë imperiative (urdhëruese) por normë lejuese (normat juridike urdhëruese, ndaluese dhe lejuese, në jurisprudencë janë tre nga llojet e normave juridike).
Bashkëveprimi i organeve të partisë është në themel të këtij neni. Dhe për ta forcuar edhe më tej logjikën dhe bashkëveprimin mes organeve të partisë, neni mbyllet kështu: “Punimet e Kuvendit drejtohen nga një komision i përbërë nga 5 anëtarë i cili zgjidhet në fillim të punimeve të tij me propozim të kryetarit të partisë”. As kjo nuk ka ndodhur.
Dhe tjetra, kuvend i jashtëzakonshëm quhet një kuvend i mbledhur jashtë përcaktimit se Kuvendi mblidhet një herë në 4 vjet. Nuk ka kuvend të jashtëzakonshëm në procedurën se si mblidhet. Ska procedurë të jashtëzakonshme.
Pra me të gjitha llojet e interpretimeve juridike i gjithë procesi i mbledhjes së Kuvendit Kombëtar nga 1/4 është proces bashkëveprimi midis 3 organeve të partisë; kryesisë ose këshillit, kryetarit, dhe vetë Kuvendit Kombëtar. Kjo është në logjikën e asaj që njihet në të drejtën kushtetuese si “ndarja dhe balancimi i pushteteve” dhe “kontroll dhe balancim” ku organet dhe institucionet kontrollojnë njëri-tjetrin.
Si rrjedhojë kuvendet e mbajtura pa ndjekur ketë rrugë, nuk prodhojnë vendime të ligjshme dhe detyruese për askënd dhe për asgjë. Kjo nënkupton se mbledhja e sotme e Këshillit Kombëtar është totalisht legjitime dhe konform rregullave statutore.
Statuti i PD është miratuar me datë 17 korrik 2021 nga anëtarë e Kuvendit Kombëtar, disa prej të cilëve pretendojnë se mbledhja e sotme është jolegjitime.
Vetë ata, me votën e tyre në 17 korrik e kanë përcaktuar rrugën se si duhet të mblidhet kuvendi. Vetë e kanë vendosur se nuk mund të mblidhen kur të duan e si të duan por duke bashkëvepruar me organet e tjera të partisë.
Tani nëse disa nuk duan ta respektojnë statutin e miratuar në 17 korrik 2021 dhe mënyrën se si mblidhen organet, është e drejta e tyre. Nëse mendojnë se statuti dhe procedurat që vetë kanë miratuar, sot nuk kanë rëndësi, është përsëri e drejta e tyre. Por mua nuk mund të më kërkojë askush të mos e respektoj e të mos e zbatoj.
Dëshirat janë dëshira, pasionet janë pasione, inatet janë inate, ndërsa statuti është statut. Shantazhet, akuzat, sharjet, përmbysja me revolucion dhe, tentativa për demotivimin e njerëzve, mund t’i pëlqejnë dikujt ose shumëkujt por, nuk kanë bazë e as bazament.
Po të ndiqej rruga statutore për mbledhje kuvendi nuk do të ishim në ketë situatë. Do të ishte zgjidhur qysh me 11 nëntor. Por dikush nuk deshi, deshi revolucion.
Si përfundim: gjithkush mundet të bëjë çfarë të dojë, të ndjekë cilën rrugë të dojë por nuk kanë pse tentojnë tua imponojnë me zor edhe të tjerëve mendimet apo qëndrimet e tyre.
