Kryesia e PD në Elbasan publikoi emrat, Gazment Bardhi kundërshton: Një pjesë e tyre nuk janë fare delegatë, e bëjnë si në Fier, firmosën 550 nga 411 që janë delegatë gjithsej.
Kryesia e Partisë Demokratike të Elbasanit ka publikuar ditën e sotme listën me 272 emrat e delegatëve që kanë firmosur pro Kuvendit të 11 Dhjetorit, të thirrur nga Sali Berisha.
Por Sekretari i Përgjithshëm i Pd-së, Gazment Bardhi, në një intervistë në “Kjo Javë” është shprehur se një pjesë e emrave që janë lexuar nuk janë fare anëtarë të Kuvendit Kombëtar, ndërsa një pjesë tjetër konfirmojnë se nuk kanë firmosur fare, megjithëse u është lexuar emri.
Ai u shpreh se emrat e delegatëve janë shënuar kot, ashtu siç ka ndodhur me delegatët e Fierit, ku në total janë 411 anëtarë, por kanë firmosur 550.
“Dua të konfirmoj që një pjesë e tyre nuk janë fare delegatë të Kuvendit Kombëtar. E di se unë jam Sekretari i Partisë dhe kam listën. Një pjesë tjetër konfirmojnë se nuk kanë firmosur fare dhe u është lexuar emri. Ajo që nisi si tallje me demokratët, po vijon si tallje me qytetarët.
Kjo shfaqja me emra të individëve që minimalisht duhet të dinin sa delegatë ka, këta dalin raportojnë shifra sipas mendjes së tyre. E njëjta gjë ndodh edhe me delegatët e Fierit. Dega Fier gjithsej ka 411 anëtarë të Kuvendit Kombëtar, ndërkohë që deklarohet se kanë firmosur 550 anëtarë të Kuvendit nga dega e Fierit. Kjo tallje do marrë përgjigje në 18 Dhjetor në Kuvendin Kombëtar të Partisë Demokratike”, tha Bardhi.
