Dy persona, mes tyre një punonjës policie, janë arrestuar për një rast abuzimi seksual me një vajzë të mitur.
Efektivi i vënë në pranga është Petraq Rako, 63 vjeç, punonjës policie Trup Shërbimi në pikën e kalimit kufitar Rrips. Ndërsa i arrestuari tjetër është S.Koloi, 62 vjeç, banues në fshatin Xarrë-Konispol. Të dy u ndaluan një ditë më parë.
Ngjarja
Hetimet për rastin nisën nga policia e Sarandës që ia kaloi më pas dosjen prokurorisë së rrethit. Burime zyrtare nga SHÇBA se nga hetimi një mujor, rezulton se S.Koloi ka shfrytëzuar për qëllime përfitimi shtetasen e mitur L.H., 13 vjeçe, duke përshtatur një ambient për shfrytëzimin e prostitucionit të fëmijës.
Punonjësi i policisë Petraq Rako është arrestuar në kushtet e flagrancës, pasi ka kryer marrëdhënie seksuale me shtetasen e mitur në ambjentet e përshtatura nga shtetasi S.Koloi, sqaruan të njëjtat burime.
Në cilësinë e provës materiale janë sekuestruar: 2 automjete; 4 aparate celularë dhe një sasi vlere monetare e dyshuar si e përfituar nga veprimtaria kriminale. Po ashtu, është vendosur sekuestro konservative ndaj ambienteve të përshtatura për ushtrimin e kësaj veprimtarie të kundërligjshme.
“Materialet proceduriale të arrestimit në flagrancë të shtetasve të mësipërm do t’i kalojnë Prokurorisë pranë Gjykatës së Shkallës së Parë Sarandë për kryerjen e veprave penale ‘Shfrytëzim i prostitucionit’, ‘Marrëdhënie seksuale ose homoseksuale me të mitur’, ‘Prostitucioni’ dhe ‘Mbajtja e lokaleve për prostitucion’”, njofton SHÇBA. Ky institucion fton qytetarët të denoncojnë çdo rast të abuzimit apo shkeljes së ligjit nga ana e punonjësve të Policisë së Shtetit duke telefonuar në numrin e gjelbër 0800 90 90.
