Nga Irena Progni, anëtare e Këshillit Kombëtar të PD-së
Është ulur profili i reagimit dhe qëndrimit deri në nivelet më të ulëta!
Unë nuk jam drejtoreshë e asnjë kohe, e preferuara e askujt, vegla e kurrkujt, veç jam produkt i kontributit, mundit, sakrificës dhe investimit tim e të familjes time përgjatë viteve.
Studimet universitare i kam filluar në gjuhët e huaja, vijuar në Fakultetin e Drejtësisë, kam mbrojtur titullin Avokat, kam kryer masterin shkencor për “Institucion dhe Legjislacion Europian” , gjithëherë në dyert e Universitetit të Tiranës, por edhe kam punuar fort njëkohësisht për të mbajtur familjen.
Eksperienca ime ka filluar në USAID/Land O’Lakes Project, ku kam punuar me përkushtim 11 vjet, vijuar me kompanitë e mëdha ndërkombëtare Tirana Airport Partners, Heifer International, Huawei Technologies për afër 8 vjet, TETE Tunnel & Mining, etj. Në çdo kompani i jam nënshtruar punësimit nëpërmjet proçesit të intervistimit zyrtar profesional më të lartë.
Trainimet dhe kualifikimet e mia kanë filluar që në 1994 të çertefikuara, brenda dhe jashtë vendit, përmend më të rëndësishmet, në Universitetin e Viterbos, Itali, në Universitetin Be’er Sheva, Izrael, në Minnesota e Washington, SHBA, Turqi, Jordani, Shanghai, Rumani, Gjermani, etj.
Ndonëse, as arsimi im, dhe as eksperienca ime nuk kanë qenë të mjaftueshme për të qenë “drejtoreshë” e ndonjë kohe a ere, reagimi im në këto kohë të valëzuara vjen si demokrate në qëndrim e në kontribute të gjithëhershme për PDSH-në..
Unë qëndroj fort për çdo demokrat, që përveç votës, nuk ka pasur kurrë zë, hapësirë, mbështetje, ndihmë, mundësi e forcë për të vendosur, për t’u shprehur e për t’u dëgjuar.
Unë qëndroj fort për një parti të djathtë në parime, në vizion, në program, në dinjitet e moral.
Unë i qëndroj fort fjalëmbajtjes, mirënjohjes, vlerësimit, besnikërisë, frymës dhe bashkëpunimit.
Unë vlerësoj fort ngritjen e sistemeve të vërteta, funksionale, efektive, që ndërtojnë për shqiptarët.
Unë vlerësoj ngritjen e strukturave të vërteta, të forta, të hapura, të pakapura, që iu shërbejnë të gjithëve dhe, që nuk plasariten lehtë nga erërat e lehta të stinëve të motmotëve.
Qëndroj fort për PDSH-në dhe tek besimi, se PDSH do të jetë e zonja t’ja dalë, pavarësisht situatave të vështira, që po kalon. Sfidat e bëjnë PD-në më të fortë, sepse nga sfidat ka lindur ✌✌✌!