Nga Aleks KAPLLAJ
Komunikimi i Ramës me shqiptarët për krizën energjitike ishte e natyrës terroriste pa paraqitur asnjë zgjidhje. Rritja e çmimeve sidomos ajo e artikujve ushqimore dhe lëndëve energjitike në muajt e fundit, nuk mund të mbulohej dhe fshihej nga propaganda e disa ministrave kukulla të qeverisë së paligjshme Rama 3, të cilët e paraqitnin situatën nën kontroll, sepse kemi një rritje ekonomike deri në 17% dhe do të kompensonte rritjen e çmimeve. Kjo e fundit nuk është gjë tjetër, vetëm një tendencë për të mbuluar humbjet që shkaktoi mbyllja e një viti më parë, duke u kthyer aty ku ishim në fillim vitin 2020.
Rama e paraqiti krizën energjitike më të rëndë dhe më të strukturuar se ajo e tërmetit dhe e Pandemisë, kjo e fundit e vënë nën kontroll sipas tij, kur në të vërtetë ajo nuk është akoma nën kontroll përderisa edhe kriza e sotme, është pasojë e saj, por edhe sepse në Shqipëri pandemia nuk është menaxhuar ashtu siç duhet, sidomos me vaksinimin e shqiptarëve, i cili nuk ishte trasparent dhe i sigurtë, ashtu si në të gjithë rajonin, sidomos në Bashkimin Evropian.
Kuptohet që kriza energjitike dhe ajo ekonomike është një realitet në të gjithë botën, ku me shumë e ku më pak. Por të gjitha qeveritë demokratike kanë kërkuar dhe gjetur zgjidhjet e duhura në eliminimin e pasojave për qytetarët dhe mekanizmat financiare dhe ekonomike në vendet e tyre për të kompensuar rritjen e çmimeve të artikujve të konsumit të përditshëm. Ndërsa Rama na paraqitet si një agjenci lajmesh ndërkombëtare dhe na jep një panoramë të pasojave të kësaj krize në vendet e rajonit e më gjerë, por nuk bën atë që duhet të bëjë një kryeministër: të gjejnë zgjidhjen dhe amortizimin e pasojave të saj për qytetarët dhe ekonominë e vendit të tij.
Kuptohet që ai e kupton që nuk ka autoritetin e kryeministrit legjitim, meqënëse është i zgjedhur me ndihmën e patronazhistëve dhe me fondet e tërmetit dhe të Pandemisë dhe për këtë krizë ai nuk ka asnjë zgjidhje pragmatike realiste, që të minimizojë pasojat e saj.
Në komunikimin e tij dukej qartë se Rama kishte si qëllim që të terrorizonte shqiptarët, duke fshehur dështimet e tij dhe boshatisjen e buxhetit të shtetit për fushatën elektorale, duke e paraqitur edhe më të rëndë situatën ekonomike në vend dhe u ndal shumë pak, për hapat që do të marrë qeveria e tij, për kompensimin e rritjes së energjisë dhe për pasojë, të shumë artikujve të konsumit të përditshëm.
Megjithatë Rama e ka një zgjidhje për të amortizuar këtë krizë, duke u mbështetur tek projekti i tij i Open Ballkan, duke kërkuar konsensusin e shqiptarëve për nismën e tij individualiste, që garanton një hegjemoni të faktorit serb në Ballkan, e paraqitur edhe si përcaktues në zgjidhjen e krizave energjitike apo edhe ekonomike, duke eklisuar krimet e serbëve kundër shqiptarëve të Kosovës gjatë shekullit të fundit, biles duke i paraqitur ata si shpëtimtar në momente të vështira, ashtu siç aludoi me rastin e tërmetit.
