Ka plot mercenarë që ta mbajnë frontin anti-opozitë gjallë

Nga Vehap Kola

8 vite nuk kanë bërë asnjë kritikë apo opozitë ndaj Ramës. Nuk njihen për ndonjë ide politike. Nuk njihen për ndonjë kontribut shoqëror. Kanë bërë vetëm lojën hileqare të luftës nën brez për poste mediokre në organizatat politike. Janë emëruar në pozita të larta politike pa asnjë sfond apo përvojë partiake. Dhe fjala e parë që kanë shqiptuar në sferën publike është sulmi ndaj opozitës.
Këta janë sot kritizerët më të papërmbajtur të opozitës. Prapë nuk artikulojnë asnjë ide. Thjesht shajnë, shpifin, aludojnë. Me një fjalë, paranojakë. Përse ta bëjnë vallë?
Janë të dëshpëruar dhe duan të bëjnë sa më shumë dëm? Edhe mundet.
Mendojnë se karriera politike do t’u shkëlqejë tani që shajnë e akuzojnë opozitën? Nuk besoj, sepse e panë fatin e murriztë të joz-patozëve dhe opozitave laboratorike. Përfunduan duke marrë nga 500 vota. Këta vërtet janë infantilë, po instiktin e interesit personal e kanë.
Atëherë, mbetet vetëm opsioni që këta i shërbejnë pushtetit. I shërbejnë se i shpërblen.
Ndërsa e ka lënë pas dore punën e tij të zemrës, talljen dhe përqeshjen e kundërshtarëve, Rama nuk e ka lënë luftën ndaj opozitës.
Ka plot mercenarë që ta mbajnë frontin gjallë.
Fati i tyre dihet.