Irena Progni, anëtare e Këshillit Kombëtar, PD
NE TRIMAT E FACEBOOK-ut!
Në Shqipëri nuk ofrohet asnjë mundësi për të ardhmen, ne qëndrojmë stoik në facebook.
Shqiptarët ikin me vrap çdo ditë nga Shqipëria, ne sërish në facebook.
Në Shqipëri del nga dera e shtëpisë e nuk e di nëse kthehesh gjallë apo jo, ne forcohemi në facebook.
Shqiptarët i vret mungesa e funksionimit të shtetit çdo ditë, ne në facebook.
Në Shqipëri të varfërit shtohen me shumicë çdo ditë, ne në facebook.
Në Shqipëri pastrohen paratë e gjithë botës, ne rritemi në facebook.
Shqiptarët shohin komshiun tek rritet e pasurohet me paratë e krimit, reagimin e bëjnë në facebook.
Në Shqipëri ndërtohen gradaçela për hesap të mafias me pushtet, ne shpalosim forcën e mendjes në facebook.
Në Shqipëri të drejtat dhe liritë themelore të njeriut nëpërkëmben çdo ditë, ne në facebook.
Në Shqipëri, roli i gruas dhe i të drejtave të saj baltosen e përçudnohen çdo ditë, ne në facebbook.
Në Shqipëri gruaja vritet pa problem për kryeneçllëk xhelozie, ne solidarizohemi me emoji në facebook.
Shqiptarët përbuzen nga mafia politike dhe krushqitë e saj, ne zvarritemi në facebook.
Shqiptarët dhunohen me propagandë mediatike dhe “analistë” mjeranë, që paguhen për të bërë ham ham, ne në facebook.
Shqiptarët shesin me qejf votën e vullnetin e tyre, por mbajnë qëndrim në facebook.
Shqiptarët paguajnë me qejf vetë për drejtësinë e zhdrejtë, por reagojnë në facebook.
Shqiptarët paguajnë me qejf për mjekësinë, që iu merr jetën, por në facebook reagojnë.
Shqiptarët kërkojnë shpëtim duke bërë zgjedhje të gabuara, ne në facebook.
Ne zgërlaqemi çdo minutë nga politika e keqe, ne bëjmë të fortin në facebook.
Shqipërisë i mohohet për të disatën herë Europa, ne në facebook.
E nëse shqiptarët shpresojnë të shpëtojnë nga lumi i qëndrimeve & reagimeve në facebook, ajo ditë do të jetë një jetë larg.
