Nga Aleks KAPLLAJ
Ish prokurori pranë krimeve të rënda Anton Martini, edhe pse e kishte kaluar Vetingun e verifikimit të trefishtë, të ligjshmërisë së pasurisë, pastërtisë së figurës dhe aftësisë profesionale nga Komisioni gjykues që përbëhej nga Genta Tafa (Bungo), Etleda Çiftja dhe Pamela Qirko (Balluku), është shkarkuar nga Komisioni publik, i kryesuar nga Florian Ballhysa. Edhe pse Martini është fituesi i pesë çmimeve nga gjashtë çmimet ndërkombëtare, që ka marrë Shqipëria në luftën kundër krimit të organizuar, nuk e ka ndaluar komisionerin Ballhysa dhe komisionin që ai kryeson, për të realizuar qëllimin e krijimit të këtij komisioni. Vetëm dy muaj mbas kalimit të Vetingut nga komisioni i posaçëm, komisioneri publik Florian Ballhysa, ka bërë një ankimim pranë kolegjit të Ankimit.
Ankimimi i komisionerit bazohet mbi të njëjtat kritere dhe të njëjtët informacione që ka ofruar Martini në kalimin e Vetingut të trefishtë. Pas verifikimit dhe kalimit të komisionit të Vetingut, Martini ishte prokurori më i kuotuar për t’u bërë prokuror i SPAK. Po cila është veprimtaria profesionale e prokuror Anton Martinit? Anton Martini, ka filluar punën në sistemin e drejtësisë në vitin 1999, mbasi ka mbaruar studimet në Fakultetin Juridik të Universitetit të Tiranës. Në vitin 2004 emërohet prokuror i Krimeve të Rënda që me përkushtimin e tij njihet si prokuror i hekurt dhe i vendosur në luftën kundër bandave kriminale, për të cilën në shumë raste është kërcënuar nga të akuzuarit e tij dhe prej disa vitesh ka edhe eskortën e sigurisë të akorduar nga shteti. Të gjitha hetimet kundër bandave më të strukturuara të Shqipërisë kanë firmën e tij.
Ai ka çuar para gjykatës bandat kryesore kriminale në Shqipëri, konkretisht bandën e Lushnjes të Aldo Bares, bandën e Cërrikut të drejtuar nga Met Bozi dhe Roland Xhepexhiu, bandën e Durrësit të Lul Berishës si dhe bandën e drogës së Met Kananit, i dënuar në SHBA për trafik droge. Gjithashtu, Anton Martini ka hetuar edhe Arben Frrokun, i dënuar me burgim të përjetshëm për vrasjen e komisarit Dritan Lamaj. Martini ka hetuar edhe dosjen e famshme 339, për Avdyljat në Shijak, nga e cila doli edhe çështja e blerjes së votave. Anton Martini gjithashtu ka kaluar në hetimet e tij edhe dosjen e Lazaratit. Në dhjetor të 2015-ës ai kërkoi 110 vite burg për Gate Mahmuatajn dhe bandën e tij të drogës.
Disa vite më pas, Martini ka qënë edhe prokuror i dosjes te atentatit ndaj prokurorit të Durrësit Arjan Ndoja, ku humbi jetën shoferi i tij si dhe u plagos një tjetër eksponent i bandave kriminale të Shijakut, Landi Muharremi, i njohur edhe me emrin Pëllumb Muharremi ose dhe i njohur si ‘Rrumi’. “Apo bash për këtë shkak dikush nuk e don në SPAK Anton Martinin?”- shkruante pak kohë më parë edhe analisti e shkrimtari Preç Zogaj, i cili dje mori përgjigjen afermative edhe të dyshimit të ekspertëve juridik: “Nëqoftëse ndalohet Anton Martini, ta mbyllin drejtësinë, sepse nuk ka kush kalon”.
Në vitin 2015, ish-kryeprokurori Adriatik Llalla e transferoi Martinin në Shkodër nga Këshilli i Prokurorisë së kohës. Ky vendim u konsiderua nga Martini si i parregullt. Megjithatë, prokurori Martini u rikthye në Prokurorinë e Krimeve të Rënda në vitin 2008. Në veprimtarinë e tij si prokuror, Martini ka treguar një profesionalizëm me kompetencë së lartë juridike, duke qëndruar larg ngjyrave politike të gjitha krahëve me të vetmin qëllim, për t’i shërbyer drejtësisë dhe vendit të tij, për të cilin është betuar para kushtetutës. Gazetarja Klodiana Lala i drejtohet kështu komisionerit publik: “A e dini Z. Ballhysa se prokurori Martini ka hetuar bosët e krimit? Nëse jo, mësojeni.
A e dini Z. Ballhysa se për Anton Martinin u paguan para nga kriminelë që të trasferohej që dosja e tyre të mos ishte në duart e tij? Besoj që jo, se ndryshe s’do e kishit kurajon të debatonit me të në Kolegjin e Posaçëm të Apelimit. Sot, Z. Komisioner Publik, që paguhesh me taksat tona për të mbrojtur interesat e publikut në procesin e Vetingut, duhet të ulesh e të shohësh me kujdes çdo detaj të jetës së këtij prokurori, që edhe duke ngrënë është vëzhguar nga syri i forcave të policisë e besoj në jo pak raste edhe nga kriminelët”. Pyetjes që bënin shumë gazetarë dhe analistë: “A do ta kalojnë Martini “Vetingun” e Kolegjit të Posaçëm të Apelimit, si një fitore e drejtësisë, apo bandat kriminale do të imponojnë vullnetin e tyre në reformën në drejtësi?”
Përgjigja është se humbi drejtësia dhe fituan bandat, që bashkëpunojnë me strukturat që përpiqen të krijojnë iluzionin e një reforme, që nuk i shërben aspak drejtësisë, por pushtetit okult të bashkpunimit të krimit me struktura të caktuara të shtetit. Aleks Kapllaj.
