Ish-deputeti lezhian Eduart Ndocaj, si një njohës i mirë i inxhinierisë gjeometrike dhe asaj ndërtuese, ka publikuar sot disa të dhëna që lidhen me shkallën e lartë të korrupsionit dhe të abuzimit me paratë publike, kryesisht në fushën e infrastrukturës rrugore.
Ndocaj, me këto të dhëna nxjerr në pah pangopshmërinë e instancave asministruese, të cilët i kanë shkaktuar dëme kolosale buxhetit të shtetit, duke përvetësuar miliarda euro nga abuzimi i tenderave publikë në ndërtimin e rrugëve në vend.
Ky studim i Ndocaj, vjen përmes metodës krahasuese që ai ka përdorur për koston e ndërtimit të rrugëve që kanë vendet e zhvilluara të Europës dhe kostoja që aplikohet në Shqipëri.
Publikimi i z. Ndocaj:
Të dhënat zyrtare nga Ministria e Financave dhe ajo e Infrastrukturës tregojnë se, ndër vite ka një diferencë të lartë të kostove të punimeve në rrugë me financim të huaj, në krahasim me financimet e brendshme.
Në mënyrë sistematike, kostot për njësi (kilometër) me fonde të huaja janë shumë më të ulëta se ato me fonde buxhetore të brendshme. Kjo tendencë vlejti edhe për vitet 2019 dhe 2020.
Një kilometër rrugë e kategorisë B, me financim të brendshëm, kushtoi në vitin 2020 mesatarisht 555 milionë lekë, ndërsa një kategori e tillë me financim të huaj, kushtoi 347 milionë lekë, ose 37% më pak.
Diferenca të mëdha u vunë re edhe në kategorinë C, ku kostoja e një kilometri me financim të brendshëm në vitin 2020 arriti në 667 milionë lekë, ndërsa me financim të huaj, ishte 111 milionë lekë, ose 6 herë më pak.