Nga Aleks KAPLLAJ
Integriteti, kultura, thjeshtësia, pastërtia etike, morale e profesionale e profesor Agron Gjekmarkaj, në shërbim të qytetarëve me objektivitet dhe pa kompromis, është një garanci më shumë për fitoren e Partisë Demokratike në Lezhë dhe në të gjithë Shqipërinë, si përfaqësues i denjë në parlamentin shqiptar.
Gjekmarkaj, ka lindur në Ishull Shëngjin në një familje atdhetare e arsimdashëse dhe shumë punëtore, me origjinë nga Mali i Shëngjinit.
Pas tetëvjeçares, ka mbaruar gjimnazin në Lezhë dhe më pas ka ndjekur dhe përfunduar studimet në fakultetin e Historisë e Filologjisë, dega gjuhë-letërsi në Tiranë, me rezultate të shkëlqyera.
Gjatë kohës së studimeve ishte edhe kryeredaktor i gazetës “Ora e Shqipërisë”.
Menjëherë pas marrjes së diplomës në Tiranë, kthehet në Lezhë, në qytetin e lindjes dhe punon si mësues letërsie në gjimnazin e këtij qyteti.
Punon aty deri në mars të 1997, kur bandat e mbeturinave të regjimit komunist, duke përfituar nga revolta e shqiptarëve që ishin vjedhur nga “bankat” piramidale në “bashkpunim” me pasivitetin dhe injorancën financiare e bankare të forcave politike të kohës, sulmuan institucionet demokratike të asaj kohe, duke e çuar vendin në prag të luftës civile, me qëllim rimarrjen e pushtetit me armë.
Po atë vit, detyrohet të largohet nga Shqipëria dhe vendoset në Toskana të Italisë, deri në 2001 duke punuar me objektiv vazhdimin e studimeve në degën e Shkencave humane.
Arrin të regjistrohet në Universitetin “La Sapienza” të Romës, në Fakultetin e letërsisë dhe më vonë, mbron shkëlqyeshëm masterin me temë “Letërsia Bashkëkohore Botërore” me maksimumin e vlersimit!
Ka punuar për disa vite në ministrinë si këshilltar i ministrit Bujar Leskaj dhe drejtor i drejtorisë në Ministrinë e Kulturës dhe më pas ka qënë këshilltar i presidentit Bamir Topi për çështjet e kulturës deri në fund të mandatit të tij.
Është profesor i “Letërsisë së Mesjetës” dhe zëvendës dekan në fakultetin e Historise e Filologjisë dhe një ndër opinionistët dhe komentuesit me të ndjekur në mediat shqiptare.
Është autor i tre librave “Reaksionari”, “Kështu foli At Zef Pllumi me gazetarët” dhe “La letteratura fantastica di Kadare” dhe ka marrë doktoraturën me temën: “At Zef Pllumi, vepra e jetës”. Është editorialist i gazetës Panorama dhe bashkpunon me shumë gazeta të tjera në shtypin shqiptar dhe analist i çështjeve politike e sociale në mediat vizive.
Është fitues i titullit si gazetar dhe opinionist për vitin 2020.
Pikërisht, në mars të këtij viti, 24 vjet pas marsit tragjik të shqiptarëve të 97-s, kur ai u detyrua të linte vendin e tij, kryetari i Partisë Demokratike, Lulzim Basha dhe qytetarët e Lezhës e kandidojnë per deputet në Qarku e Lezhës me përgjegjësinë e përfaqësimit në parlamentin shqiptar. Agroni është përfaqësuesi i jonë, është njëri nga ne.
Agroni, ashtu si edhe shumë kandidatë të Partisë Demokratike të këtyre zgjedhjeve, i plotëson të gjitha cilësitë që duhet të ketë çdo kandidat sipas akademikut Artan Fuga, ku ndër të tjera thotë: “deputeti i Kuvendit të Shqipërisë nuk është këshilltari i bashkisë apo i komunës. Sado besnik ndaj partisë që të jetë. Ai duhet të dijë të kontrollojë qeverinë, të aprovojë traktate ndërkombëtare, të firmosi ligje, të iniciojë ligje, të dëgjojë e interpretojë ekspertët në komisione, të dialogojë me ndërkombëtarë”- cilësi që profesor Dr. Agron Gjekmarkaj i ka të gjitha.