Eduart Ndocaj, kandidat i aleancës “Demokracia e Re”, në qarkun e Lezhës, ka dalë sot me një deklaratë, përmes së cilës ka denoncuar fenomenin masiv të shit-blerjes së votës në të gjithë Shqipërinë.
Në këtë deklaratë, Ndocaj u ka kërkuar agjencive ligjzbatuese të hetojnë fenomenin, si dhe të kapin në flagrancë autorët e kësaj masakre elektorale që po kryhet nga segmente të botës së krimit që janë të lidhura me pushtetin mavi të Edi Ramës.
Gjithashtu, ish-deputeti u ka bërë thirrje shqiptarëve, të mos shiten, pasi kështu po vrasin të ardhmen e vendit! Nuk është kjo mënyra e duhur për të dhënë verdiktin, pasi ato para që u jepen sot në këmbim të votës, janë “helm në kupën e shpresës”, ka nënvizuar “kaubojsi”.
Deklarata e plotë:
Të dashur vëllezër dhe motra shqiptarë!
Këto ditë po informohem në mënyrë konstante se dora kriminale e “rilindjes” ka shtrirë kthetrat e saj në cdo cep të vendit, duke blerë vota dhe duke synuar të mbajë pushtetin e saj me para të pista.
Ky fenomen i kobshëm për fatet e demokracisë sonë, këto ditë është shfaqur haptazi, duke sfiduar ligjin dhe parimet themelore mbi të cilat është ndërtuar rendi demokratik. U këkroj organeve kompetente, agjencive ligjzbatuese, të investigojnë dhe të marrin masat e tyre në parandalimin dhe degradimin e mëtejshëm të situatës, pasi një deformim i tillë i vullnetit të zgjedhësve do të shoqërohet me pasoja të mëdha për rendin kushtetues në vend.
U bëj thirrje përfaqësive diplomatike, të ndërhyjnë menjëherë pranë qeverisë shqiptare dhe të dënojnë këtë batërdi që po kryhet me porosi të kryeministrit, i cili ka lëshuar taborin e tij të blerësve të votave në cdo qytet dhe fshat të Shqipërisë. Nuk është e vështirë të verifikohet një fenomen i tillë, mjafton që organet kompetente të hetojnë kontaktet telefonike të “të fortëve” dhe aty do zbulohet e gjithë skema e organizimit të këtij fenomeni kriminal. Unë akuzoj drejtpërdrejt Edi Ramën, si kreun e kësaj bande, i cili me paratë e PPP-ve, me përfshirjen e individëve me rekorde kriminale dhe me kryebashkiakët e emëruar, po inicojnë një proces zgjedhor nga më të turpshmit dhe më të manipuluarit në historinë e zgjedhjeve pluraliste.
Vëllezërit e mi shqiptar!
Ato para që u serviren sot, janë paratë e vrasjes së të ardhmes suaj, janë paratë e krimit të organizuar, i cili po synon ti zgjatë jetën vetes dhe kreu të saj në krye të qeverisë, janë helmi që u serviret në kupën e shpresës, prandaj refuzojini dhe mendoni për një cast rëndësinë që ka vota juaj! Denonconi këto individë, pasi po vjedhin të ardhmen tuaj, bashkërisht le ti japim shpresë këtij vendi!
Eduart Ndocaj
