Nga Elsa SULA
Vetëm pak ditë kanë kaluar nga çelja e fushatës zgjedhore e kandidatët për deputet na “zënë pritë”. I dashur deputet i së ardhmes,kur të vish të më kërkosh voton eja me platformë të shkruar bukur dhe qartë,pasi unë e kam një farë bindjeje se ju e dini që jetoj në një lagje pa drita,pa ujë, pa rrugë …ia për këto më premto se ndoshta platforma jote godet më lart e kështu nuk më prek mua ,as të drejtën time për të votuar. Mos më flit me zë të lartë për atë çfarë ka bërë ose do të bëjë partia jote,as mos akuzo kundërshtarët,sepse nuk më prek e shkuara veçse më vret me premtimet e pambajtura në kaq vite.
Deputet i së ardhmes dua ndryshim,dua shpresë,dua punë. Nuk e dua kujdesin tënd të 30 ditëve për mua,nuk e dua as buzëqeshjen e dashurinë tënde parazgjedhore,më tremb. Këtë përkujdesje të fushatës zgjedhore ma përkthe në punë e më bind se po,ju jeni zëri im në parlament. Më bind se ju jeni i zgjedhuri i duhur. E di mirë se në 30 ditëshin tënd të punës do ulesh gju më gju me mua e bashkë do t’i qajmë hallet,por unë kam për të jetuar edhe 330 të tjera me mungesën e zërin tënd ,që këto kohë më buçet fort. Do ta harroj fytyrën tënde ,që këto 30 ditë e ndesh kudo.
Do të harroj numrin e kontaktit tuaj,që sot mund t’a gjej kollaj e mbi të gjitha për ty nuk do më flasë askush. As je shok,mik,nip,i afërm i filanit e unë për nder të dikujt të kam njohur. Unë jo! Nuk mundem të njoh dikë të tillë. Veç ndryshimit shpresëdhënës…
Deputeti i ëndrrave mos më zgjo këtë pranverë nëse nuk di të marrësh përgjegjësi,nuk mund të mbush as CV-në dhe as xhepat tuaj. Më fal nëse unë jam ironike përballë teje,kjo tregon se kështu është puna jote me mua e fati im të votoj platforma që mbeten vetëm disa rreshta të shkruara diku.
