Nga Aleks KAPLLAJ
Kur na ndajnë pak më shumë se 40 ditë nga zgjedhjet e 25 prillit, kur Edi Rama po numëron ditët e fundit të pushtetit të tij autokratik, përçarës dhe përbuzës ndaj qytetarëve, Lulzim Basha ka ndezur entuziazmin e rikthimit të pluralizmit dhe demokracisë, e rikthimit te shpresës, pa dallim bindjesh politike dhe të garancisë së realizimit të ëndrrës të popullit shqiptar, për integrimin e vendit tonë në familjen e Bashkimit Europian.
Dje dhe sot në Kavajë, Durrës, Lezhë e Elbasan dhe nesër në Shkodër, Vlorë, Korçë, Peshkopi, Tepelenë, Fier, Lushnje, Mirditë, Krujë, Berat, Tropojë, Gjirokastër, Sarandë, Tiranë dhe në të gjithë Shqipërinë, Lulzim Basha po pritet dhe do të pritet si kryeministri i ardhshëm i Shqipërisë.
Basha po prezanton programin dhe kandidatët, më të mirët për momentin, për të garantuar një fitore që u takon të gjithë shqiptarëve, sepse me programin e Aleancës per Ndryshim, fitojnë të gjithë shqiptarët.
E gjithë forca e kryeministrit të ardhshëm të vendit është mbështetja që ka ai në të gjitha shtresat shoqërore të Shqipërisë, të botës së biznesit dhe të prodhimit, të shërbimeve dhe të shëndetësisë, të kulturës dhe të artit, të pensionistëve dhe rinisë, punonjësve të administratës apo të punësuar në kompanitë private dhe ish të persekutuarit e regjimit komunist dhe me vetëdijen e përgjegjësisë për realizimin e tij.
Basha me programin e qeverisë së tij, po nënshkruan kontratën me të gjithë shqiptarët: me fermerët, me sektorin e turizmit dhe të tregtisë, me arsimtarët dhe studentët, me mjekët e ndershëm dhe të gjithë ata që e kaluan virusin dhe që duhet të rimbursohen 100%, me invalidët, me pensionistët që duhet të kenë një pension që garanton minimumin jetik. Kjo arrihet edhe me uljen e taksave si të biznesit dhe qytetarëve dhe sidomos atyre që nuk kanë të ardhura, deri në ndihmën financiare për burimet jetike, duke ulur evazionin fiskal.
Basha po nënshkruan kontratën me të gjithë shqiptarët që duan shtetin e së drejtës që themelohet mbi lirinë, familjen dhe pronën private, që garanton zhvillimin e një shoqërie duke promovuar meritokracinë dhe kompetencat e çdo shqiptari, pa braktisur asnjë në garancinë e një jete dinjitoze.
Rama tashmë ka humbur mbështetjen edhe të socialistëve të ndershëm të thjeshtë apo edhe të shumë senatorëve të Partisë Socialiste, që po i përjashton një nga një nga mundësia për të hyrë në parlament, sepse me humbjen e zgjedhjeve, ka frigë se do të humbasë edhe partinë.
Rama është në ditët e tij të fundit si kryeministër dhe kjo e tregon edhe injorimi i çdo këshille nga ambasadorët perëndimor!
Ai injoroi disa herë edhe thirrjen më llogjike të ambasadores së SHBA, zj. Yuri Kim dhe të ambasadorit të BE në Tiranë, Luigi Soreca për dekriminalizimin e listave për kandidatët e partive për deputetë në parlamentin shqiptar. Të njëjtën gjë e bëri me Teatrin Kombëtar që e shembi edhe pse ambasadorët kërkuan një konsensus me shoqërinë civile dhe AMT, me ndryshimet në kodin zgjedhor që i votoi pa kompromisin opozitë-pozitë, duke e larguar përherë e më shumë Shqipërinë nga standartet perëndimore.
Përtej dështimeve të Ramës në dy mandatet e tij, qëndron programi realist dhe gjithpërfshirës që po paraqet Lulzim Basha para shqiptarëve duke u afruar fitores së 25 prillit, që shqiptarët po binden çdo dit e me shumë se mund t’i besojnë qeverisjen e vendit dhe orjentimin perëndimor në integrimin e Shqipërisë në Bashkimin Europian, si familja e jonë natyrale.
