Nga Erion Dasho/
Kur sheh hartën europiane të kontrollit të epidemisë së COVID-it, Shqipëria me një Rt = 0.9 hyn ndër vendet më të suksessëm (ngjyra bojë qielli tregon kontroll të mirë të epidemisë, ndërsa ngjyra e verdhë dhe rozë situatë të pakontrolluar).
Faktikisht, kjo është Rt-ja imagjinare e Boratit dhe nuk ka asnjë lidhje me atë që ndodh realisht në terren. Me afrimin e zgjedhjeve, Boratit i duhet kontrolli i epidemisë për të propaganduar suksesin e radhës. Duke qenë se epidemia nuk kontrollohet dot pa masa, Borati ka zgjedhur mënyrën e vetme të “kontrollit” që është i aftë të zbatojë, mashtrimin dhe manipulimin.
Së pari, ulet numri i testeve. Nga 4,000 teste që kryheshin në janar dhe shkurt, sot bëhen 3,000 teste në ditë Sa më pak teste, aq më pak raste. Sa më pak raste, aq më pak vdekje.
Së dyti, blihen teste më pak cilësorë me sensitivitet më të ulët. Në këtë mënyrë, edhe kur një person ka prani të virusit në rrugët e frymëmarrjes, testi e nxjerr “të shëndetshëm”. Ky rezultat quhet “fals negativ”.
Së treti, anashkalohet momenti i artë i testimit. Testi i shpejtë ka vlerë 4-5 ditët e para të sëmundjes. Duke përdorur me marifet sistemin e referimit, kryerja e testit shtyhet pas ditës së pestë apo të gjashtë, kur virusi nuk është më prezent në hundë apo fyt. Fatkeqësisht, në këtë kohë virusi mund të ketë kaluar në mushkëri me pasoja që merren lehtë me mend.
***
Në ndryshim nga sivëllezërit afrikanë që kanë zgjedhur të mos testojnë askënd dhe të deklarojnë “fitoren” mbi virusin, Borati ka zgjedhur rrugën e ndërmjetme, atë të mashtrimit. Ai teston pak dhe teston keq.
Gjithsesi, rezultati është i njëjtë me atë që kanë arritur vëllezërit e tjerë mashtrues. Shqipëria tashmë edhe sipas ekspertëve të Harvardit (të cilët janë të detyruar të përdorin shifrat e manipuluara të Boratit) rezulton një shkëmb i ri graniti buzë Adriatikut.
Ndërkohë njerëzit sëmuren dhe vdesin si më parë.
Borat,
Mënyra e “kontrollit” të epidemisë që ke zgjedhur ti dhe boratët e tu është kriminale. Ajo kalon mbi të sëmurë dhe të vdekur të padiagnostikuar.
Deri tani janë mbi 8,500 vdekje shtesë për të cilat duhet dhënë llogari. Fatkeqësisht, për shqiptarët që ende qeverisen nga ty, ky numër veç po rritet.
Borat,
Në kulmin e pandemisë, ti i le shqiptarët pa teste, pa mjekim, pa spitale dhe tashmë edhe pa vaksina. E ktheve Shqipërinë në një vend sëmundje dhe vdekje.
Në këtë tragjedi ka vetëm një anë pozitive. Koha e dhënies llogari po afron!
***
Shënim: shifrat e manipuluara të ministrisë së shëndetësisë dhe komitetit janë përdorur rëndom gjatë gjithë pandemisë nga puthadorët e Boratit për të mashtruar publikun.
Kur deklarohet në media se “OBSH e rendit Shqipërinë midis vendeve të suksesshme” apo “bazuar në ëebsite prestigjioze si Worldometers apo universitete si Johns Hopkins, Shqipëria ka pak raste apo pak vdekje”, faji nuk është i këtyre institucioneve dhe organizatave; ato thjesht përdorin të dhënat që prodhojnë mashtruesit tanë.
Kësisoj, Borati dhe boratët mund të quhen pa frikë “mashtrues në katror”, pasi gënjejnë fillimisht të huajt dhe më pas duke përdorur këto informacione të rreme, mashtrojnë edhe shqiptarët.
Me të vërtetë djallëzorë…
