Eglantina Gjermeni nuk do të jetë në listën e kandidatëve të Partisë Socialiste për zgjedhjet e 25 prillit. Ky lajm është përcjellë vetë nga ana e kryeministrit Rama, i cili shpreh falenderimet për kontributin e saj në PS. Gjermeni ishte deputete e Partisë Socialiste, ndërsa në vitin 2013 shërbeu si Ministre e Zhvillimit Urban dhe Turizmit.
“Mirënjohje gjithmonë në këtë Ditë të Gruas, dy bashkëpunëtoreve simbol të promovimit të legjislacionit mbi barazinë gjinore, të drejtat e grave, fëmijëve, minoriteteve dhe kundër dhunës ndaj gruas; dy aktivisteve shembullore të Shoqërisë Civile, që sollën në PS vlera e kontribute të reja dhe për 12 vjet rresht e përfaqësuan PS me dinjitet e profesionalizëm, në Kuvend e në Qeveri, Vasilika Hysi dhe Eglantina Gjermeni”, njofton Rama.
Më herët, deputetja e PS-së, Vasilika Hysi, njoftoi largimin nga politika. Hysi e cilësoi Reformën në Drejtësi si një arritje për të cilën është krenare, dhe tha se do ta mbështesë partinë në zgjedhje nga jashtë.
Po kështu, Eglantina Gjermeni është një tjetër largim i rëndësishëm nga PS, pas Vasilika Hysit, Besnik Baraj, Sadri Vorpsi, Sadri Abazi dhe Alfred Pezës.
