Prapaskenat/ Basha dhe Kryemadhi plan për të kandiduar në 9 qarqe veç dhe në 3 bashkë, për të “çimentuar” votat

PD dhe LSI kanë zgjedhur të përdorin një taktikë të re, për të maksimalizuar votën në 25 prill.

Basha dhe Kryemadhi do të kandidojnë me lista të veçanta në nëntë qarqe dhe me një listë të përbashkët në tre qarqe të tjera.

Qëllimi është që të mos humbasë asnjë votë opozitare dhe thellimi i rezultatit në ato qarqe ku duhet bërë diferenca siç është Tirana, Durrësi, Elbasani.

PD dhe LSI do të garojnë secila me listën e vet në Tiranë, Durrës, Elbasan, Korçë, Fier, Lezhë, Shkodër, Berat dhe Vlorë. LSI pretendon të nxjerë deputetë në këto qarqe prandaj edhe ka zgjedhur që të dalë e vetme duke patur edhe mbështetjen e PDS-së së Paskal Milos, mëson ABC.

Ndërkohë, PD dhe LSI do të garojnë nga ana tjetër me një listë të përbashkët, në qarkun e Dibrës, Kukësit dhe Gjirokastrës, ku ka një numër të vogël votuesish.

Partia e Kryemadhit ka nxjerrë deputetë edhe në Gjirokastër edhe në Dibër, megjithatë futja e kandidatit të saj kryesor në listën e PD-së synon që të çimentojë mandatin.

Pavarësisht kësaj, LSI pritet të nxjerrë edhe një listë fiktive për këto 3 qarqe, e cila do të ketë vetëm efekt ligjor dhe elektoral pasi fushata do të bëhet duke ftuar kuksianët, dibranët dhe gjirokastritët që të votohet kandidati i LSI në listën e PD-së.

Kujtojmë se sot është afati i fundit për regjistrimin e koalicioneve në KQZ.