Nga Myzafer ELEZI
Të nderuar miq,
Me interes lexova dokumentin e hartuar nga Instituti për Demokraci dhe Ndërmjetësim (IDN), për periudhën 2013 – 2020, të emërtuar: Plan Veprimi “FORCIMI I INTEGRITETIT DHE LLOGARIDHËNIES NË POLICINË E SHTETIT”, janar 2021.
Si ish punonjës policie, por edhe si qytetar i Republikës së Shqipërisë, jo vetëm jam indinjuar për konkluzionet e këtij raporti, por me keqardhje mund të them se, Policia e Shtetit është në krizë të thellë, regresi i së cilës është thelluar deri në ekstrem. Ky nuk është vetëm perceptimi im personal, por edhe i institucioneve që monitorojnë punën e Policisë së Shtetit.
Për më shumë mund të lexoni disa nga konkluzionet e IDN, të shkëputura nga raporti i sipërcituar:
PROFESIONALIZIMI I DREJTIMIT TË PSH:
Ndikimi i politikës tek Policia e Shtetit përgjatë periudhës 2013 – 2020 perceptohet si faktor me ndikim të fortë ose shumë të fortë në përhapjen e korrupsionit në PSH nga rreth 71% dhe 76% e qytetarëve.
Përgjatë të njëjtës periudhë, mesatarisht një në dy (2014) dhe një në tre (2016 dhe 2020) punonjës policie kanë ndarë të njëjtin mendim.
Në vitin 2020, 50% e punonjësve të policisë të anketuar nga studimi i IDM kanë deklaruar se nuk janë dakord me pohimin se “Drejtuesit politikë nuk e përdorin policinë për qëllime politike dhe korruptive”.
Gjithashtu, 40% e tyre nuk ishin dakord as me pohimin se “Drejtuesit politikë dhe punonjësit e policisë bashkëpunojnë ndërmjet tyre për të luftuar korrupsionin”.
Përqindjet e mosdakortësisë nga ana e publikut lidhur me këto dy deklarata janë kuptueshëm më të larta, 63% dhe 51% respektivisht, pra me një hendek prej 10 pikësh përqindje përafërsisht.
PËRMIRËSIMI I MENAXHIMIT POLICOR:
“Kultura e punës në institucionin e PSH” dhe “Menaxhimi i dobët i PSH” shihen si faktorë risku në përhapjen e korrupsionit në Polici jo vetëm nga publiku, por gjithashtu edhe nga ana e punonjësve të PSH.
Më shumë se gjysma e publikut e sheh menaxhimin e dobët të PSH si faktor risku në 2016 dhe 2020, respektivisht 78% dhe 55% e tyre.
Një përqindje mjaft e konsiderueshme e punonjësve të policisë ndajnë të njëjtin mendim me qytetarët lidhur me këtë faktor, përkatësisht 41% në vitin 2016 dhe 45% në 2020-ën.
Kultura e punës në PSH shihet në mënyrë kritike thuajse nga 2/3 e publikut në të tre studimet, ndërkohë që diçka më pak por sërish një përqindje e konsiderueshme e të punonjësve të PSH ndajnë të njëjtin qëndrim – respektivisht, 42% (2014), 33% (2016) dhe 43% (2020).
Sa më sipër Instituti për Demokraci dhe Ndërmjetësim sugjeron se, ka një nevojë të ngutshme për të siguruar pavarësimin e performancës së PSH nga politika.
