Kreu i Forumit Rinor të PD-së, Belind Këlliçi ka kujtuar sot Kongresin Kombëtar të Lushnjës, që nisi punimet 101 vjet më parë dhe miratoi Aktin Kushtetues për pavarësinë e plotë të Shqipërisë dhe të shtetit shqiptar.
“Një realitet aspak i ngjashëm me të tashmen, ku një njeri i vetëm vetë firmos, vetë vulos. 101 vjet më pas kemi një parlament kukullash që miratojnë ligje pa i lexuar, pa diskutuar, vetëm me urdhër nga lart me sms”, shkruan kreu i FRPD.
Këlliçi thekson se Rama na ktheu 101 vjet pas, “me Tau Ballën, Sadri Abazin, Armando Prengën, Spiropalin dhe të gjithë zvarranikët si ta që ndërrojnë lëkurë“.
Postimi i plotë
Kongresi Kombëtar i Lushnjës, ndarja demokratike e pushteteve, atdhetarët e vërtetë dhe 21 janari.
Si sot 101 vjet më parë nisi punimet Kongresi Kombëtar i Lushnjës, i cili miratoi Aktin Kushtetues për pavarësinë e plotë të Shqipërisë dhe të shtetit shqiptar, si edhe zgjodhi Këshillin e Naltë prej 4 vetash, regjencën, që do të kryente funksionet e kryetarit të shtetit dhe Këshillin Kombëtar prej 37 vetësh, në funksion të parlamentit. Kongresi formoi qeverinë demokratike me kryeministër Sulejman Delvinën dhe me vendimet e tij kombëtare i hapi rrugën Luftes çlirimtare të Vlorës dhe themelimit të shtetit shqiptar të lirë, të pavarur dhe demokratik.
Kongresi zgjodhi katolikun imzot Luigj Bumçi, myslimanin Mehmet Konica dhe ortodoksin Dr. Turtulli, si përfaqësues legjitimë të popullit shqiptar në delegacionin e Konferencës së Paqes në Paris. Kongresi zgjodhi anëtarët e Senatit dhe caktoi Tiranën si kryeqytet të Shqipërisë.
Ky historik i shkurtër për të sjellë në vëmendjen tuaj se si klasa politike shqiptare, pa dallim feje, krahine dhe ideje, arriti të bashkohej për të ndalur copëtimin e vendit dhe forcimin e institucioneve nëpërmjet ndarjes së pushteteve. Një realitet aspak i ngjashëm me të tashmen, ku një njeri i vetëm vetë firmos, vetë vulos. 101 vjet më pas kemi një parlament kukullash që miratojnë ligje pa i lexuar, pa diskutuar, vetëm me urdhër nga lart me sms. 101 vjet më pas shteti ynë nuk ka institucione funksionale por një padron që marrëveshjet i bën me dreka e darka, i pa shoqëruar nga një përfaqësi eskpertësh e juristësh.
21 janari i Kongresit të Lushnjës ështe dita e shtetit institucional, që ajka intelektuale dhe atdhetare kishin në vizionin e tyre.
Krenar për Mytesim Kelliçin, i cili ishte përfaqësues i Durrësit, Kavajës dhe Tiranës në këtë kongres. Krenar për stërgjyshin tim, Masar Këlliçin, deputet i Tiranës dhe i Durrësit në parlamentin e parë shqiptar.
Rama na ktheu 101 vjet pas, me Tau Ballën, Sadri Abazin, Armando Prengën, Spiropalin dhe të gjithë zvarranikët si ta që ndërrojnë lëkurë.
Bashkim pa dallim kundër injorancës, kusarisë, tradhtisë dhe delirit të Edi Ramës! Fitore mbi injorancën, hajdutërinë dhe servilizmin më 25 prill!
