Një lajm i trishtë në këto ditë festive është ai i largimit nga jeta të 25-vjeçarit Jurgen Çipi. Jurgeni ishte një këngëtar i ri me frymë pozitive.
Prej vitesh ai vuante nga një sëmundje e rëndë, të cilën e kuroi edhe jashtë vendit, gjë që nuk mjaftoi për të dalë fitmar prej saj.
Plot energji, pasion dhe ëndrra për jetën, nuk e la fatkeqësinë ta mposhte, por luftoi deri në frymën e fundit. Edhe pse e dinte fatin që e priste, përgjatë viteve punoi fort për të lënë shenjën e tij në këtë botë kalimtare.
Jurgeni njihej si një djalë social, i qeshur dhe mbi të gjitha artist. Një shigjetar super aktiv me origjinë nga Klosi. Kreu studimet e larta në Universitetin e Tiranës dhe ishte i apasionuar pas muzikës “Hip-Hop”.
3 vitet e fundit ai ja dedikoi kësaj rryme, ku në 2017-tën publikoi videoklipin “Bashkë”, i cili u prit shumë mirë nga publiku. Duke vijuar më pas me një sërë projektesh muzikore si: “A ja ka vlejt”, “Mos u dorzo”, “Sikur ti”, “E pim, e pim” etj.
I ftuar në emisione të ndryshme televizive, asnjëherë nuk e tregoi dhimbjen as frikën, por gjithmonë me mirënjohjen ndaj Zotit dha mesazhe të forta mbi jetën.
Një humbje e madhe kjo për familjen, shoqërinë dhe të gjithë ata që patën fatin ta njohin. Jurgen Çipi la pas një emër të mirë dhe do të kujtohet gjithmonë nëpërmjet këngëve!
Ngushëllime familjes!
/InfoPressAlbania/ (E.D)
