Parlamenti i Shqipërisë do të mblidhet të hënën në orën 10:00, për të miratuar ndryshimet e bëra në Kodin Zgjedhor.
Pika 3 e rendit të ditës do të jetë pikërisht hedhja në votim e projektligjit “Për disa ndryshime dhe shtesa në ligjin nr. 10.019, datë 29.12.2008 “Kodi zgjedhor i Republikës së Shqipërisë” të ndryshuar””.
Për Kodin Zgjedhor kërkohet, shumicë e cilësuar votash për miratim, 84 të tilla.
Një ditë më parë Kryeministri Edi Rama deklaroi se miratimi i ndryshimeve në Kod do të bëhet me shumicë Kushtetuese, duke shtuar se qëndrimet mes palëve për arritjen e konsensusit janë të largëta.
Rama tha se nuk është i kënaqur nga ndryshimet e Kodit pasi PS ka votuar për çështje që sipas tij nuk ishin fare në axhendën e tyre.
“Kemi qenë që në fillim shërbëtorë në këtë proces, duke ndjekur negociata me opozitën parlamentare dhe atë joparlamentare. Votuam për Komisionet Zgjedhore politike, ndërkohë që ishim për depolitizimin e tyre”, tha Rama.
Çështjet më të debatuara janë koalicionet parazgjedhore dhe hapja e listave. Për të parën, socialistët kanë propozuar që koalicionet të funksionojnë vetëm përmes një liste të përbashkët kandidatësh, pra disa subjekte në një koalicion kanë vetëm një listë, duke zhbërë formulën e deritanishme të koalicioneve me lista të përbëra. Ndërsa listat e hapura mbetën thjesht një propogandë pasi me variantin e propozuar emrat e kandidatëve renditen nga Kryetari i partisë dhe renditja ndryshon vetëm kur njëri prej kandidatëve merr 10 mijë vota.
