Zgjedhjet e 30 Gushtit janë një moment historik për shqiptarët në Mal të Zi, që edhe pse të ndarë tashmë në dy lista, kanë mundësinë të votojnë shqip që të sigurojnë një përfaqësim më gjithëpërfshirës dhe të denjë të shqiptarëve në parlamentin e Malit të Zi.
Ish-deputeti lezhian, Eduart Ndocaj, si një patriot i devotshëm, sa herë ka zhvillime me interes kombëtar, për të gjithë shqiptarët kudo ndodhen, brenda, apo jashtë territorit të Republikës së Shqipërisë, shfaq një interesim konstant, duke përcjellë mesazhe inkurajuese dhe motivuese.
Përmes një statusi në profilin e tij facebook, Ndocaj është ndalur tek zgjedhjet e 30 gushtit në Mal të Zi, ku ka adresuar apelin e tij për faktorin shqiptar, i cili në këto momente duhet të dëshmojë se cështja kombëtare dhe të drejtat eshqiptarëve duhet të prevalojnë mbi ndasitë politike.
Ndocaj, thekson më tej se elektorati shqiptar dhe Diaspora duhet të vlerësojnë këtë moment historik për të tashmen dhe të ardhmen e shqiptarëve në Mal të Zi, për të bashkuar të gjitha forcat dhe për të avancuar pozitën e shqiptarëve në qeverisje dhe vendimmarrje.
Ish-deputeti, i konsideron historike zgjedhjet e 30 Gushtit 2020 që do të përcaktojnë edhe ekzistencën dhe vazhdimësinë shqiptare në Mal të Zi. Më tej ai shton se bashkimi, bashkërendimi dhe bashkëpunimi i faktorit politik shqiptar në një listë dhe platformë duhet të jetë rruga e vetme e avancimit të shqiptarëve në Mal të Zi.
Ndocaj i bën thirrje gjithë spektrit politik dhe elektoratit shqiptar që të votojnë me mençuri dhe me zemër vetëm për subjektet politike shqiptare.
Në mesazhin e tij, ish-deputeti simpatik dhe i mirënjohur në të gjitha trevat shqiptare, Eduart Ndocaj, ka vecuar rolin që kanë këto zgjedhje, ku përmes tyre, shqiptarët do faktorizojnë kauzën e tyre të shkëputjes përfundimtare nga dominimi sllav, si dhe ecjen para të prosperitetit dhe integrimit të tyre afatgjatë në rajon dhe më gjerë.
