Nga Pashko GECAJ
Tashmë është bërë traditë që,”Ditën e Currajve të Epër”, të Shtunën e dytë të muajt Gusht, gëzimi, hareja, kënga e vallja, të ushtojë e të gjallërojë jeta në zëmrën e Bjeshkëve të Namuna, në amfiteatrin natyror, mrekulli e natyrës, me emrin Curraj Epër.
Të Premten me 7 Gusht, e të Shtunën në mëngjes heret, makinat vinin njëra pas tjetrës në Logun e Kishës, vinin bijë e bija, nipa e miqë, por dhe dashamirë të Currajve të Epër.
Erdhën nga Tirana, Shkodra, Kosova, Puka, nga Shala e Shoshi, nga Nikajt e Mërturi, por pati dhe miq e shokë nga Lushnja e Dibra, që duke sfiduar frikën nga pandemia COVID dolën të festonin së bashku me Ne në vendorigjinën e Eposit të Kreshnikëve.
Mori avionin, të Premten, nga Londra dhe në mesnatë mbërriti në C. Epër, enkas për të festuar e çmallur në vendlindjen e tij, Skënder Përpepaj, biri i këtij fshati, i cili është kujdesur për pastrimin e rrugës së dëmtuar nga dimri, duke bërë, që makinat të dalin pa problem këtë Verë në Curraj Epër.
Që muzika të jehonte deri në majat e malit të Boshit e Kakisë, nga ora 09.oo të Shtunën, ishte kujdesur dixhej, Shkëlzen Gecaj.
Nga ora 11.oo, festarët, të bashkuar buzëlumit, në Logun e Mrishajve, u argëtuan nën tingujt e muzikës së këngëtarve me emër në gjithë Shqipërinë e më gjerë, Prof. Prek Mrishaj, Gofile Paplekaj, Bardhok Prebibaj (ai që gjithmon ka qënë i pranishëm në këtë festë), Nikolin Përpali, Gjergj Gjoni dhe i përhershmi, lahutari Vuksan Mrishaj.
Në këtë ditë feste, majat ushtonin, njerzit kërcenin e argëtoheshin. Sot dhe Zanat e Shtojzovallet me siguri kan pushuar duke dëgjuar këngët e bukura të kënduara nga këta bilbila të këngës popullore e qytetare.
Me 7 dhe 8 Gusht, Curraj Epër ishte fshati më i populluar dhe e kryeqëndra e muzikës në rrethin e Tropjës.
U shpërndamë duke uruar njëri tjetrin : Mirë u takofshim vitin që vjen, të Shtunën e dytë të Gushtit, ishalla më mirë e të çliruar nga stresi i pandemisë.
Zoti i bekoftë Currajt e Epër !
