Nga Ambra NAZARKO
Ministria e Arsimit, Sportit dhe Rinisë ka caktuar datën 12 qershor si datë për zhvillimin e zgjedhjeve për rektorë dhe dekanë në Universitete.
Sipas Ligjit Nr. 80/2015 “PËR ARSIMIN E LARTË DHE KËRKIMIN SHKENCOR”, dekanët dhe rektorët zgjidhen nga pedagogët dhe studentët.
Në kundërshtim të plotë me nenin 38 të rregullores “ Për organizimin e zgjedhjeve për autoritetet drejtuese në senatin akademik në Universiteti e Tiranës” i cili në pikën “b” të tij i shpall zgjedhjet të pavlefshme në rastin e gjendjes së jashtëzakonshme ku kanë munguar zgjedhësit.
Pra, cilët studentë do të votojnë, në kushtet kur për shkak të gjendjes së pandemisë, universitetet janë bosh? Një datë e tillë zgjedhjesh është në kundërshtim me ligjin, u mohon studentëve të drejtën e votës, e cila edhe pse me peshë të vogël po tentohet të zhduket fare.
Gjithashtu u mohon kandidatëve të drejtën dhe detyrimin për të shpalosur platformat e tyre, si dhe shton mundësitë për manipulim.
Komisioni Institucional I Zgjedhjeve (KIZ) është institucioni kompetent për drejtimin dhe zhvillimin e zgjedhjeve dhe zgjidhet nga Senati Akademik.
Në kushtet kur mandati I KIZ ka përfunduar, përse nuk zgjidhet KIZ I ri me qëllim zhvillimin e zgjedhjeve të ligjshme? Por ndërkohë kundërligjshmëria shtohet akoma më shumë duke zhvilluar zgjedhje fiktive.
MASR verifikon ligjshmërinë e zhvillimit të zgjedhjeve në institucionet publike të arsimit të lartë dhe përcjell për emërim kandidatin fitues të zgjedhjeve për rektor në universitetet publike te Presidenti i Republikës. Presidenti i Republikës a do ta dekretoje 1 rektor të ri të dalë nga zgjedhje të kundërligjshme?
Ajo që duhet bërë është të shtyhen zgjedhjet deri në fillimin e vitit të ri akademik,me qëllim shmangien e kundërligjshmërisë, parandalimin e manipulimeve zgjedhore si dhe të mos u mohohet studentëve e drejta e votës.
Meqenëse mandatet e rektorëve dhe dekanëve aktualë kanë përfunduar, do të ishte me vend që universitetet dhe fakultetet të drejtohen nga zëvendës rektorët dhe zëvendës dekanët derisa të zhvillohen zgjedhje në përputhje me rregulloren dhe ligjin Për Arsimin e Lartë.
