U bënë ditë, javë dhe muaj, që mbarë bota po vuan, po stërkeqet dhe po lufton me një armik, i cili sulmon jetën e gjithë secilit prej nesh.
Njerëzimi është bërë i barabartë në çdo cep të globit, e ku si emërues të përbashkët, ka një të keqe me emrin Covid 19.
Kjo e keqe e përbashkët, e cila të kufizon nga liria, nga mungesa për të takuar njerëzit më të dashur dhe nga ecuria normale e jetës, është ulur këmbëkryq dhe po bën karshillek, e ku distancimi fizik, është një element tepër jetik në këto ditë.
Kam një lutje për mbarë globin, që të shpëtojmë sa më parë nga kjo ëndërr e keqe e stërzgjatur, që të mban ngjitur, në makthin e saj më të errët!
Kam një lutje për të gjithë prindërit kudo që janë, ta kalojnë sa më lehtë këtë kohë të pa kohë!
Kam një lutje për të gjithë ata/ato, të veshur më uniformën e tyre të shërbimit, që sot më shumë se kurrë, janë aty për ne, për t’i bërë më të lehta, këto ditë tepër të vështira, për mbarë njerëzimin!
Kam një lutje për të gjithë ata bebe që erdhën në jetë, në këtë pranverë, e cila ngjan si një dimër i acartë, por jetët e reja, tregojnë tharmin e vazhdimit të jetës!
Kam një lutje për çdo shqiptar, kudo që ndodhet, që ta kalojë këtë situatë, shëndoshë e mirë!
Kam një lutje për familjen time, për familjen tënde, për familjet e të gjithëve NE!
Por mbi të gjitha kam një lutje për Hasin dhe gjithë hasjanët!
Uroj me zemër, që Hasi të hiqet sa më shpejt nga lista e të prekurve me Covid 19!
Hasi im besnik, Hasi im i mirë, Hasi im i dashur, TI DO IA DALËSH!
