Presidenti amerikan Donald Trump deklaron se SHBA-të duan të dërgojnë hetues në Kinë për të hetuar shpërthimin e koronavirusit. Këto deklarata ai i bëri gjatë konferencës së përditshme mbi koronavirusin.
Sipas CNN, SHBA-të kanë bërë edhe më parë kërkesa të tilla, të cilat janë kundërshtuar nga Pekini zyrtar.
Shtëpia e Bardhë ka akuzuar vazhdimisht Kinën se ka fshehur informacionin e saktë në lidhje me shtrirjen e virusit brenda Kinës, rrjedhimisht ka fshehur edhe numrin real të viktimave.
“Ne po bisedojmë me Kinën. Ne iu kemi kërkuar atyre edhe para shumë kohësh që të mund të hetojmë në Kinë për virusin. Ne duam të hyjmë”, tha Trump gjatë konferencës. Pak ditë më parë presidenti i SHBA-ve njoftoi se i ka hequr fondet OBSH-së pasi sipas tij ka fshehur situatën reale në Kinë, dhe ka ndihmuar në përhapjen e virusit.
Nga ana tjetër dhe 3 shtete europiane, si Britania e Madhe, Franca dhe Gjermania kanë drejtuar gishtin nga Kina, që sipas tyre ka gënjyer gjithë botën për numrin e vdekjeve.