Një tjetër pacient, 69-vjeçar, ka humbur jetën nga Covid-19, duke e çuar në 27 numrin e personave që kanë humbur betejën me koronavirusin.
Mësohet se pacienti që ka humbur jetën pasditen e sotme ishte shtruar në spitalin Infektiv, i kthyer tashmë në një spital “Covid1”.
Pacienti ishte nga Shkodra dhe ishte transportuar pak ditë më parë nga spitali rajonal drejt Infektivit, në gjendje të rëndë shëndetësore.
Viktima e 27 e Covid 19, sipas burimeve spitalore, kishte sëmundje bashkëshoqëruese.
Ndërkohë Ministria e Shëndetësisë, në një sqarim zyrtar nuk e klasifikon humbjen e jetës së pacientit nga Shkodra për shkak të Covid 19.
“Pacienti 69-vjeçar nga Shkodra që ka ndërruar jetë në spitalin infektiv, ka humbur jetën si pasojë e sëmundjes hemoragjisë cerebrale (aksidentit vascular hemoragjik).
69-vjeçari ishte prej 13 vitesh me tumor në kokë dhe kishte kryer 3 ndërhyrje. Kishte hemorragji cerebrale dhe ishte në gjendje të rëndë në koma.
Sipas spitalit infektiv, 69-vjeçari nuk ka ndërruar jetë si pasojë e COVID-19, pasi ishte bartës i virusit, por pa shenja të sëmundjes, (asimptomatik) dhe ka ndërruar jetë si pasojë e hemoragjisë cerebrale.
Ministria e Shëndetësisë i shpreh ngushëllime familjes së të ndjerit dhe informon se do të mbajë të informuar publikun për çdo zhvillim, ndaj lutemi t’i referoheni njoftimeve zyrtare”,, thuhet në njoftimin e Ministrisë së Shëndetësisë.
Ky është rasti i katërt, që për pacientë që kanë humbur jetën në spitalin Infektiv ose te Shefqet Ndroqi, Ministria e Shëndetësisë nuk i klasifikon si humbje jete nga Covid 19, me argumentin se pacientët ishin asimptomatikë.
