Nga Elona CASLLI
Jeta private dhe publike janë dy botë të ndryshme në thelb. Respektimi i këtij ndryshimi është kushti që njeriu mund të jetojë si njeri i lirë; që perdja e cila ndan këto dy botë, është e paprekshme dhe shkulësit e perdeve janë kriminelë.
Kam thënë se përhapja e intimitetit të tjetrit, sa po bëhet zakon dhe rregull, na fut në një epokë, basti më i madh i së cilës, është mbijetesa ose zhdukja e individit.
Milan Kundera-Testamente të tradhtuara.
Vendosa ta filloja këtë artikull me këtë fragment të Milan Kunderës për të trajtuar një fenomen, që për fat të keq haset dendur në shoqërinë tonë.
Fenomeni në fjalë është as më pak e as më shumë, veçse një shëmti njerëzore.
Prej një muaji qarkullonte në rrjet një video intime e një gazetareje, ku kjo e fundit shfaqej në çaste intime me një burrë.
Sipas të dhënave, rezulton se në video shfaqet vetëm imazhi i gazetares dhe imazhi i burrit nuk shfaqet.
Për një “rastësi të mbrapshtë” na thuhet emri, mbiemri dhe profesioni i gruas dhe asgjë për burrin.
Kjo video rezulton e bllokuar tashmë, pasi gazetarja i është drejtuar gjykatës për shkelje privatësie.
Lind pyetja: Pse duhet të arrihej në bllokimin e videos, kur mund ta paraprinim mosshfaqjen e kësaj të fundit?!
Ka një perde që ndan jetën publike nga jeta private. Shkulësit e perdeve në këtë rast janë kriminelë.
Në rastin konkret shkulësit e perdeve janë të gjithë ata individë, që e kanë shpërndarë atë video.
Një video nuk mund të vetëshpërndahet pa mbështetjen e dorës së një njeriu. Duhet dora e një njeriu që ia dorëzon një njeriu tjetër, për të krijuar zinxhirin e shpërndarjes.
Dhe duket se hallkat e zinxhirit të shpërndarjes, kanë funksionuar mirë, për sa kohë kjo video është shpërndarë gjerësisht në rrjet.
Nëse një nga hallkat do ta kish braktisur misionin e shpërndarjes, kjo e fundit nuk do të kish qenë kaq e lehtë dhe kaq e gjerë.
Nëse dikush do të kishte vendosur që videon që mori në “what’s up” nga dikush tjetër, ta fshinte dhe të mos ta shpërndante , zinxhiri do të këputej dhe madje me shumë shembuj të tillë, as nuk do të ekzistonte si zinxhir.
Intimiteti i dikujt është zona e paprekshme e tij. Është perdja që ai vendos midis vetes dhe botës, ose më saktë është divorci që ai kryen me botën.
Të përdorësh intimitetin e dikujt për ta sulmuar këtë të fundit, është një gjë primitive dhe e shëmtuar.
Nuk e di kush është titullari i vajzës në fjalë, por kushdo qoftë, do të bënte mirë që përmes kësaj ngjarjeje, t’i jepte një leksion të mirë, të gjithë atyre që shkulin perdet e jetës personale.
Këtë leksion do ta jepte duke e mbështetur këtë vajzë dhe duke mos ndërmarrë asnjë masë kundër saj.
Nëse do të isha unë titullari i vajzës në fjalë, kisha për ta shoqëruar personalisht në zyrën e saj pranë kolegëve, për të dhënë mesazhin se duhet të dënohen shkulësit e perdeve dhe jo viktimat e tyre.
Post Scriptum- Kemi dy lloje morali pranë njëri-tjetrit; moralin që predikojmë, por kurrë nuk e zbatojmë dhe moralin që zbatojmë, por shumë rrallë e predikojmë.
Bertrand Russell
