Nga Fatmir HALILI
Të jepen vlerësime sot, të shajmë sistemin e arsimit, të shajmë politikën, të shajmë ministrat që kanë bartë pozitën politike të ministrit në Ministrinë e Arsimit, nuk është e drejtë! E aq më pak, nga ata që fare nuk i njohin problemet në arsim!
Para së gjithash, duhet të ndalemi dhe të trajtojmë stadin fillestar të edukimit që marrin fëmijët tanë! Në veçanti, sa janë prindërit përgjegjës për edukimin dhe arritjet e fëmijëve të tyre?! Pastaj të kalohet tek mësimdhënësit dhe të tjerët që punojnë në sistemin arsimor!
Një nga problemet që na ka vrarë sistemin arsimor, dhe në përgjithësi arsimin, para së gjithash janë vetë prindërit, e pastaj të tjerët! Në këtë rast, do të dalloja dy element të rëndësishëm:
E para, vetëknaqja e prindërve me arritjet fallso të fëmijëve të tyre! Një gjë për të cilën do të pajtoheshim në mënyrë unike se, në fund të çdo viti mësimorë dyert e shkollave vërshohen nga prindërit për të përmirësuar notat e dobëta të fëmijëve të tyre në shkollë, ndërsa gjatë tërë vitit nuk bisedohet me fëmijën për këto probleme! Këtu nuk ka faj politika e as mësimdhënësi, fatkeqësisht, mësimdhënësit po i detyrojmë të japin nota pozitive në çdo formë të mundshme! Shpeshherë, jemi në gjendje të mos u flasim mësimdhënësve vetëm pse nuk ka dhënë notë pozitive për fëmijën tonë! Prandaj, domosdo përgjegjësi duhet të marrin edhe ata, që sot shajnë e fyejnë sistemin arsimorë, politikëbërjen dhe vet shtetin! Pra, duhet të jemi edhe vetkritik ndaj asaj çfarë po ndodh në shoqërinë tonë, dhe jo vetëm të përplasim përgjegjësinë tek të tjerët!
E dyta, pa mëdyshje, mbetet politika lokale përgjegjëse për gjendjen në arsimin fillor dhe të mesëm! Pse është kështu, sepse politika lokale, në fakt udhëheqësia komunale, janë të implikuar drejtpërdrejtë në përzgjedhjen e drejtorëve të shkollave dhe mësimdhënësve, ku në çdo rast, janë selektime ekskluzivisht politike dhe familjare! Kjo, ka bërë të mundur, që mësimdhënës të jenë edhe ata që fare nuk kanë dije për të qenë pjesë e arsimit, por ka rastis të jenë pjesë e partisë në pushtet, ose familjarë apo të njohur të pushtetarëve.
Kjo gjendje mund të ndryshohet, nëse duam ne! Ama të gjithë ne, e jo vetëm dikush që për momentin është në pushtet! Sa herë të gjuajm përgjegjësinë te njëri tjetri, duke mos qenë vetkritik dhe duke mos pranuar realitetin, gjendjen do ta kemi të njëjtë!
