Kryetari i Këshillit Kombëtar të Shqipëtarëve në Serbi, Ragmi Mustafa, edhe këtë 28 Nëntor ka vendosur flamurin kombëtar në ballkonin e objektit të Këshillit, mirëpo i menjëhershëm ka qenë reagimi i Policisë së Serbisë, raporton portali “Front Online”.
Mustafa ka konfirmuar për “Front Online” se dhjetë minuta pasi e kishte vendosur flamurin kombëtar në objektin e Këshillit Kombëtar Shqipëtar, në zyret e tij ishin paraqitur dy policë të Serbisë, të cilët i kishin kërkuar informata se kush e ka bërë një veprim të tillë “të ndaluar me ligj”.
“I kam thënë policëve se për vendosjen e flamurit kombëtar marr përgjegjësi unë si kryetar, prandaj vazhdoni me punën tuaj. Është e palogjikshme se si Serbia ka bërë përparim të madh drejt BE-së, derisa komuniteteve ua mohon të drejtën e shfrytëzimit të flamurit, si e drejtë themelore”, shprehet Mustafa për “Front Online”.
Përndryshe, derisa në Republikën e Kosovës në të gjitha Komunat me shumicë serbe lirshëm valon flamuri i Serbisë, në komunat me shumicë shqiptare në Serbi është i ndaluar me Ligj përdorimi i flamurit kombëtar.
