Në një kohë kur ka mijëra qytetarë të frikësuar pas tërmetit që goditi vendin mëngjesin e së martës dhe la pas të paktën 50 viktima, qeveria e ka shfrytëzuar këtë për të nisur një luftë të paprecedentë ndaj mediave, dhe ndaj personave që janë në gjendje paniku.
Kështu policia njofton se ka arrestuar një 25 vjeçare në Durrës, që sipas tyre shpërndante informacione të rreme, por në asnjë moment, nuk shihet se çfarë ka shpërdarë qytetarja.
Si të ishte një nga kriminelet më të rrezikshme në vend, njoftimi i policisë e nxjerr vajzën e arrestuar me emër dhe me mbiemër, ndërkohë që në linkun e profilit të saj, nuk shihet asnjë lloj përmbajtje me qëllim nxitjen e panikut.
Jo më larg se dje policia procedoi dhe dy administratorët e JOQ, po ashtu me pretendimin se nxisnin panik me postimet e tyre.
Njoftimi i policisë së Shtetit:
Strukturat e specializuara të Policisë së Shtetit në vijim të masave të marra për parandalimin dhe ndëshkimin ligjor të atyre personave, të cilët nëpërmjet njoftimeve të rreme në rrjetet sociale, përhapin panik me lajme destabilizuese, ka vijuar intensivisht punën në evidentimin, dokumentimin dhe ndëshkimin ligjor të çdo rasti.
Në këtë kuadër, Drejtoria e Antiterrorit arrestoi në flagancë shtetasen Xhuljana Aliaj, 25 vjeçe, lindur dhe banuese në Durrës, e dyshuar për kryerjen e veprës penale “Përhapja e informatave të rreme që ngjallin panik”.
Gjatë monitorimit të burimeve të hapura (rrjeteve sociale) nga struktura të Drejtorisë së Antiterrorit është konstatuar se shtetasja Xhuljana Aliaj, ka postuar nga profili i saj në rrjetin social “Facebook”, në linkun https://www.facebook.com/xhulja.aliaj shkrime me përmbajtje të rreme dhe jo të vërteta, duke kryer kështu përhapje të panikut nëmërmjet efekteve të këtyre lajmeve.
Drejtoria e Antiterrorit në bashkëpunim me strukturat e tjera të specializuara në Policinë e Shtetit kanë evidentuar edhe raste të tjera për të cilat në bashkëpunim me Prokuroritë e rretheve përkatëse po vijon me procedimet penale dhe për çdo rast do informohet media e publiku.
Policia e Shtetit apelon edhe njëherë për të gjithë qytetarët që të mos bien pre e mashtrimeve të lajmeve që shpërndahen në rrjete sociale, të cilat krijojnë panik dhe fton cilindo që has në të tilla njoftime paniku të njoftojë menjëherë Policinë e Shtetit në numrin 112, apo në Komisariatin Dixhital.
