Pedagogë, studentë dhe qytetarë kanë dalë ditën esotme në marshim-protestë, kundër vendimit të qeverisë për kalimin e Kopshtit Botanik në administrim të Bashkisë.
Në pritje të vendimit të Gjykatës së Apelit Administrativ, ata kanë nisur prej orës 11:00 marshimin nga Universiteti i Shkencave të Natyrës.
Pedagogia Mimoza Hafizi tha se vendimi i qeverisë është një grabitje e pastër.
“Jemi bashkë dhe protestojmë ndaj kësaj grabitje të universitetit publik. Kjo është një grabitje e pastër. Profesor Petriti është një nga kontributorët kryesor për krijimin e këtij aseti. Është një zhbërje e një kontributi të gjatë dhe një grabitje e pastër”, deklaroi Hafizi.
Ndërsa profesor Petrit Hoda, drejtues i Kopshtit Botanik, tha se bëhet fjalë për një kontribut 50-vjeçar të qindra e mijëra botanistëve, zoologëve e studentëve.
“Ne shkurre bëjmë, nuk bëjmë raketa kozmike. Është ndërhyrë në kopsht por kopshti nuk është kompensuar me asnjë qindarkë. Ndërhyrja do prishë shumë ekuilibra në kopshtin botanik. Gjendja e kopshtit është shumë e mirë dhe të gjitha insinuatat që bëhen nuk janë korrekte, nuk janë dashamirëse”, tha profesor Hoda./Gazeta Liberale
