Sekretari i Përgjithshëm i Partisë Demokratike, Gazmend Bardhi ka reaguar pas miratimit të rezolutës me shumicë nga Parlamenti Europian për çeljen e negociatave për Shqipërinë dhe maqedoninë e Veriut. Duke shprehur mirënjohjen për PE-në, Bardhi shprehet se vendimi është një tjetër “mesazh i qartë se Europa e konsideron Shqipërinë pjesë të saj.”
“Shqipëria është me fat që ka kaq shumë miq dhe mbështetje në rrugën e integrimit europian!
Mirënjohje për mbështetjen e sotme të Parlamentit Europian! Ky është një tjetër mesazh i qartë se Europa e konsideron Shqipërinë pjesë të saj. Është detyra e Shqipërisë që, pa humbur asnjë minutë kohë, të plotësojë të gjitha kushtet për të mos marrë refuzimin e rradhës.
Shqipëria ka nevojë për një Qeveri të dalë nga zgjedhje të lira e të ndershme, që e ka prioritet integrimin europian, që është e sinqertë me partnerët europianë dhe nuk tenton tu hedh hi syve për plotësimin e 9 kushteve dhe që punon për shqiptarët dhe Shqipërinë si gjithë Europa”, ka shkruar Bardhi.
