Partia Demokratike ka denoncuar edhe njëherë Valdrin Pjetrin, apo farsën e Edi Ramës në Shkodër, se ka fshehur dënimin që ka në Itali.
Deklarata u bë nga Sekretari i Përgjithshëm i PD-së, Gazmend Bardhi, i cili shkruan se Rama detyroi Pjetrin të gënjejë sërish, ndërkohë që trafikanti i Ramës publikoi dokumente që mashtrojnë opinionin publik, ku për të fshehur dënimin edhe Pjetri ashtu si Elvis Roshi publikoi dëshminë e penalitetit si çertifikatë virgjërie.
‘Edi Rama detyroi serish Valdrin Pjetrin të mashtrojë për të mbuluar të kaluarën e tij si trafikant droge. Pasi dështoi me TIMS-in, që fakton se Valdrin Pjetri nuk ka shkelur në Itali për 7 vjet, trafikanti i Ramës publikoi dokumente që mashtrojnë opinionin publik për të kaluarën e tij kriminale.
Njëlloj siç bëri edhe Elvis Rroshi për të fshehur dënimin, edhe Valdrin Pjetri, sot publikoi dëshminë e penalitetit si çertifikatë virgjërie.
Ky dokument nuk ka asnjë vlerë.
Kushdo e di që pas kalimit të një periudhe të caktuar kohore, dënimi i marrë në të shkuarën nuk shkruhet më në dëshminë e penalitetit.
Ky është edhe rasti i dokumentit të publikuar nga Valdrin Pjetri. Ai dokument nuk provon që një person nuk ka qenë ndonjeherë i dënuar.
Për t’i rifreskuar kujtesën drejtuesit politik të Edi Ramës në Qarkun Shkodër, për sonte po bëjmë vetëm 1 pyetje:
Çfarë të kujton data 27 Janar 2003?’
