Lirimi i bashkive të djathta, ish-deputetja e PD-së: Nuk i lirojmë, do presim Gjykatën Kushtetuese të vendosë
Ish-deputetja e Partisë Demokratike, Dhurata Çupi, deklaron se normaliteti nëpër bashki do kthehet vetëm nëse në vendin tonë do ketë zgjedhje të lira e të ndershme.
Duke komentuar situatën e tensionuar sot në Bashkinë e Devollit, ish-deputetja Çupi në një intervistë për “News 24” deklaroi se kryebashkiakët qëndrojnë në detyrë derisa të zhvillohen zgjedhje të ndershme.
E pyetur nëse ka folur me kryebashkiaken Voltana Ademi, ajo u shpreh se qytetarët shkodranë nuk mund ta pranojnë një situatë të tillë, ku zyra merret me dhunë, madje as socialistët e ndershëm.
“Kryetari i bashkisë qëndron në detyrë derisa të zhvillohen zgjedhje të ndershme. Si mund të pranojnë qytetarët e Shkodrës? Ne do presim të ngrihet Gjykata Kushtetuese. As socialistët e ndershëm nuk e pranojnë këtë proces. Si mundet një kryetar bashkie të futet në zyrë me dhunë”, u shpreh ish-deputetja demokrate, Dhurata Çupi.
Pjesë nga intervista
Pse bëtë marrëveshje me artistët?
Kemi bërë marrëveshje me artistët që mbrojnë godinën, është diçka krejt normale. Ne kemi qenë në mbështetje të kauzës së artistëve. Është me vlera të jashtëzakonshme dhe duhet të mbetet aty. Godina rikonstruktohet. Ne sot kemi një Tiranë vetëm me kulla e beton. Ne do jemi në krah të artistëve gjatë gjithë verës për ta mbrojtur teatrin.
Cilat janë kauzat e tjera të aksionit opozitar?
Deri më 31 gusht, ka vendim të Partisë Demokratike, ku janë kryetarët e degëve, të deleguarit dhe vetë Lulzim Basha, që po bëjnë një organizim dhe strukturim të brendshëm të partisë. Në të ardhmen do ta detajojmë. Kemi kontakte të vazhdueshme me target grupe që janë në vështirësi për jetesën, me të gjithë ata që kanë nevojë për ndihmë. Ne do merremi në detaje me çdo shqetësim të qytetarëve. Do bëjmë gjithçka për progresin në vendin tonë.
