Ish-kandidati për bashkinë e Lezhës, Eduart Ndocaj, ka vazhduar dhe sot me publikime që nxjerrin në pah krimin elektoral të 30 qershorit, ku krahas ironisë së përdorur ndaj votuesve që janë kanë shitur votën, ai nuk ka kursyer dhe talljen e tij me këtë fenomen mjaft të përhapur, duke e shoqëruar dhe me foto nënkuptuese, si çmime qesharake për votuesit, të cilët kanë pranuar të bëhen pis me shitjen e votës, duke mos marrë aspak parasysh të ardhmen e fëmijëve të tyre.
Ndocaj, përmes postimeve të tij, gjithnjë e ka vënë theksin tek shitblerja e votës, si një dukuri që po ndikon dukshëm në përcaktimin e rezultateve zgjedhore.
Në fund të postimit të tij, Ndocaj ka falënderuar votuesit e thjeshtë të tij, të cilët kanë refuzuar të bëhen pjesë e këtij fenomeni, si dhe u ka dhënë garancitë e duhuara se ata asnjëherë nuk do të braktisen nga ai.
Gjithashtu, Ndocaj, ka njoftuar se ka depozituar në Kolegjin Zgjedhor ankesën e tij për manipulim të procesit nga ana e kandidatit socialist Pjerin Ndreu, si dhe ka depozituar në Prokurori një kallëzim ndaj ish-rivalit të tij për kërcënime dhe kanosje.
Ja postimi plotë i Ndocajt:
Çmimi i një pjese të socialistëve apo një pjesë e demokratëve në ditë për 4 vite që erdhen tek unë gjatë 50 ditëve para datës 30 qeshor për t’u shitur të ardhmen fëmijëve të tyre për një birrë apo një thes miell.
I kritikova të gjithë, diskutova me ta se vota nuk i shitet asnjë njeriu të ndershëm, jo më djallit që solli rilindja në Lezhë. Një pjesë e mirë u bindën e më votuan në bazë të programit tim që kisha për varfërinë, familjen, rininë, sportin, kulturën, bujqësinë e turizmin; një pjesë tjetër iu drejtua zyrës së djallit që thesin e kishte të madh, u shitën shpirtin mafias, u shitën të ardhmen e fëmijëve të tyre bandave të tokave e hashashit. Unë dua t’i falëderoj se pjesa më e madhe e socialistëve të ndershëm dhe disa demokratë më vlerësuan, s’do u zhgënjej! Kam çuar në KQZ dhe në Kolegjin Zgjedhor fakte për të denoncuar krimin elektoral të ndodhur në Lezhë. Kam ngritur padinë kundër Pjerin Ndreut në Prokurori për kërcënime ndaj meje e qytetarëve, për manipulim të kutive të votimit, për vjedhje të votave në numrim dhe për vjedhje votash në rregjistrimin online në KQZ, ku del me zë dhe figurë duke kërcënuar drejtorin me largim nga detyra si dhe duke kërcënuar administratën e duke kërcënuar qytetarë të thjeshtë . Do të luftoj për ato mijëra demokratë e socialistë që më 30 qershor kërkuan ndryshimin dhe kërkuan një kryetar me vizion e të ndershëm.
