Mbledhje dhe analiza në Asambletë e PS për çdo bashki. Është kjo porosia që ka dhënë kryeministri Edi Rama, njëherazi edhe kryetar i PS-së, në mbledhjen e kryesisë së kësaj partie, 3 ditë pas zhvillimit të votimeve më 30 qershor.
Në mbledhjen e kryesisë mësohet se është diskutuar edhe mbi vazhdimin e procedurave për shkarkimin e Ilir Metës nga posti i Presidentit, ndërsa Kuvendi pritet të zhvillojë seancën më datën 8 korrik ku do të ngrihet edhe komisioni hetimor që do të hetojë Kreun e Shtetit.
Burimet bëjnë të ditur se kryeministri është shprehur i vendosur për t’i shkuar deri në fund procesit, ndërsa ka kërkuar praninë e të gjithë deputetëve socialist në seancën e 8 korrikut, e cila do të mbahet pasdite.
Një tjetër pikë, e diskutuar në mbledhjen 90 minutëshe të kryesisë së PS-së, ka qenë ajo mbi votimet e 30 qershorit.
Mësohet se Rama ka deklaruar mbledhjen e Asamblesë Kombëtare në fund të muajit korrik, ndërsa ka paralajmëruar një analizë të thellë jo vetëm mbi rezultatin e votimeve për secilën bashki, por edhe për atë që më parë, Rama e ka cilësuar si mesazhin qytetar për qeverisjen e vendit.
Në mbledhjen e kryesisë janë diskutuar rezultatet e votimeve, duke u përqëndruar veçanërisht te pjesëmarrja, e cila sipas opozitës është në kuotën e 15 %, ndërsa sipas KQZ-së te 20.6 % të numrit të përgjithshëm të zgjedhësve.
Burime nga PS bëjnë të ditur se pjesëmarrja është konsideruar e kënaqshme, për faktin se ajo është pothuajse e njëjtë me numrin e votave që vetë socialistët kanë marrë në zgjedhjet e shkuara, pavarësisht disa luatjeve që sërisht konsiderohen normale për shkak të situatës politike.
