Kryebashkiakët e djathtë kanë deklaruar se nuk do të dalin nga zyra, pasi nuk njohin rezultatet e votimeve njëpartiake të 30 qershorit. Deputetja e PS-së, Elona Gjebrea, e ftuar në ”A2 CNN”, u pyet mbi deklaratat e disa kryebashkiakëve demokratë të cilët kanë refuzuar që të lirojnë zyrën. Xhelal Mziu deklaroi se ”në 13 tetor unë sfidoj këdo me një garë të hapur dhe jam i sigurtë se do të jetë fitorja ime më e thellë”. Kur u pyet se si veprohet në një rast të tillë, Gjebrea u përgjigj: “Kush guxon që të cenojë shtetin e së drejtës do të përballet me forcën e ligjit. Janë deklarata të bëra nga kryetarë bashkish që nuk janë votuar nga populli dhe do të përballen me kuadrin ligjor të vendit. Mendoj që janë kërcënime me efekt emocional sepse ata janë të detyruar që në gusht të lënë zyrën. Është e pamundur që të funksionojë kaosi. Uroj që të mos shohim shfaqje të shëmtuara”.
